SLOW TV KNR TV-ip allatut periuseqarluni tv-kut aallakaatitseriaaseq misililerpaa taannalu ima taaneqartarpoq SLOW TV
SLOW TV sunaava? SLOW TV tassaavoq tv-kut aallakaatitseriaaseq ukiorpaalussuarni tv-liortunit allanit misiligarneqarsimasoq. Aallakaatitsinermi aallakaatitap piffissaq atugaa malillugu aallakaatitsisoqartarpoq, tassa assimi isiginnaakkap piffissaq atugaa piffissatut naatsorsuutigineqassaaq. Taamatut aallakkatitseriaaseq inuppassuarnit nuannarineqarpoq nunanilu allani misilittarneqar-simalluni, soorlu Norgemi. Norgemi isiginnaartorpassuit qimuttuitsut Oslomiit Bergenimut ingerlaannerat malinnaaffigisinnaasimavaat aammalu umiarsuup ikaartaatip Bergenimiit Kirkenes-imut ingerlaarnera malittarisinnaasimallugu.
SLOW TV atorlugu KNR maannakkut misiliinialerpoq. Taamatut takutitseqqaarnissami malinnaaffigineqarsinnaavoq sinersortaatip Maniitsumiit Ilulissat tungaannut ingerlaarnera. Arctic Umiaq Line suleqatigalugu aasaq manna aggustip qaammataata naalernerani KNR SARFAQ ITTUK-mut angalaqataavoq. Assiliissut filmiliutaasoq umiarsuup aquttarfianut inissinneqarpoq, tassaanngaanniillu umiarsualivimmiit umiarsualivimmut ingerlaarnerit assilineqarsinnaasimapput.
Aallakaatitsinermi siullermi umiarsuup Maniitsumiit Kangaamiut tungaannut ingerlaarnera isiginnaarneqarsinnaassaaq, tamannalu pissaaq arfininngorpat novemberip ulluisa 29-anni nalunaaqutaq 14:45 pingasunut tanneq qulingiluanut. Sapaassuarmi 30. November nalunaaqutaq 11:00 nalunaaqutaq aqqanernut Kangaamiuniit Sisimiut tungaannut ingerlaarneq takutinneqassaaq. Aallakaatitat ukua KNR 1-kut takutinneqassapput. Isiginnaartussat angalalluarnissaannik KNR-ip kissaappai.
Annertunerusumik paasisaqarusuttut ukununnga paasiniaasinnaapput TV-mi pisortaq Jan Berg jbe@knr.gl imaluunnit piorsaavimmi pisortaq Niels Pavia Lynge npl@knr.gl oqarasuaat 36 15 00.
