KNR KNR Radio toqqaannarnerusoq

Tusarnaartartunut tusarnaartorilerumaagassanullu aallakaatitseriaaseq nutaaliaanerusoq, eqaannerusoq minnerunngitsumillu ullutsinnut naleqquttoq qulakkeerniarlugu KNR Radio allorialerpoq. Aallakaatitseriaaseq flow radio atorlugu aallakaatitsisoqartalissaaq. Taamaallilluni toqqaannartumik aallakaatitat, nunatsinni ullutsinni pisunik imallit amerlanerulissapput.

Radiuliornermi pitsaassutsip periarfissallu atorluarnissaat tassani pineqarpoq. Pisut pineranni nukiit pigisavut atorluarlugit aallakaatitsisassaagut, KNR Radiomi pisortaq Masaana Egede oqarpoq.

Ulluunerani toqqaannartumik aallakaatitsinerit soqutiginartut, ullutsinnut naleqquttut inuppalaartumik saqqummiunneqartut, ukiumit nutaamit tusarnaarneqarsinnaalissapput. Ukiarli manna toqqaannartumik aallakaatitsinerit amerlaneruleriissapput.

Tusarnaartartut kissaatigisaat

KNR Radiop aallakaatittagaasa allanngortinnissaat 2015-imi isiginnaartartunik tusarnaartartunillu misissuineq tunngavigalugu ilaatigut suliarineqarput. Misissuinerummi takutippaa aallakaatitassiat maannaqqissaaq pisunit imaqartut kulturimullu tunngasut tusarnaartartunit kissaatigineqartut.

Taamaalilluta piginnaasat pigisavut atorlugit tusarnaartartut kissaataat anguniakkavullu piviusunngortissinnaavagut.

Taamaaliornissarpullu periusissatut pilersaarutitsinnut aamma innuttaasunik sullissinissamik isumaqatigiissutitsinnut naleqquttuuvoq, KNR-ip pisortaanera Karl-Henrik Simonsen oqarpoq.

Kinguaariit tamarmik aallakaatitseriaatsimi eqqarsaatigineqassapput, imarisatigut aammali nipilersukkanik atuinermi. Sinerissami illoqarfiit tusaataat aamma illoqarfinni nunaqarfinnilu ilanngutassiortut suleqatigilluarnissaat KNR Radiop suinertariuarpaa.

Kulturimik, ilisimasanik, oqaatsinik inuiaqatigiillu pillugit ilisimasanik tamanut siammarterisussatut sullissiviuvugut, taamaammat kinguaariit tamarmik peqataatinnissaat pingaaruteqarpoq, KNR-p pisortaa Karl-Henrik Simonsen oqarpoq.

 

Paasissutissat sukumiinerusut ukunani pissarsiarineqarsinnaapput: KNR-imi pisortaq, Karl-Henrik Simonsen khs@knr.gl aamma KNR-imi radiop pisortaa, Masaana Egede meg@knr.hl oqarasuaat +299 36 15 00

Isummersuutit

KNR attaviginiarukku ataani immersuivik atorlugu allaffigisinnaavatsigut emailikkulluunnit info@knr.gl

imaluunniit uunga KNR | Box 1007 | Issortarfimmut 1A | 3900 Nuuk

Tlf. (+299) 361500 | Fax. (+299) 361502

Akineqarusukkuit email allaguk. Inuttut pisinnaatitaaffitit ataqqillugit emailadressit allanut tunniunneq ajorparput
Suna pillugu attaviginiarpitigut?
Oqaatigerusutatit uani allakkit