KNR Radio Nakuusamut katersuiniarluni arpatsitsilerpoq

Meeqqat kinguaassiutimikkut atornerlugaasarnerat akerlilerniarlugu KNR Ratiup ullaakkut aallakaatittagaa Nunatta Nipaa nunatsinni arpatitsinerit annertunersaannik aaqqissuussivoq.

Tusarnaartartut arpaqataanermikkut takutissavaat meeqqat kinguaassiutimikkut atornerlugaasarnerat akuerisinnaanagu, ilutigitillugulu Nakuusap pinaveersaartitsinermi suliaqarnera tapersersorlugu.

Peqataasut amerlassusaat aningaasaliisut tunniussassaannut aalajangiisuusssaaq. Bank Nordikimi aningaasaliissamaarpoq; peqataasut 1.000-it ataappagit arpaqataasoq ataaseq 5 koruunimik naleqassaaq, arpaqataasullu 1.000-it sinnerpagit arpaqataasoq ataasseq 3 koruunimik naleqassalluni. Aningaasat tamarmik Nakuusamut tunniunneqarumaarput.

Tusarnaartartut kajumissutsiminnik ikiuuttut

Illoqarfinni tamani nunaqarfinnilu arlalissuarni tusarnaartartut kajumissutsiminnik ikiuuttussat nunatsinni katersuiniarluni arpatsitsinerit annertunersaat piviusunnngortissavaat. 
Kajumissutsiminnik ikiuuttussat inuit assigiinngitsorpassuupput; najukkaminni sunniuteqarluartut ilaatigullu atuartut soorlu Maniitsumi Efterskolertut aamma suliffeqarfiit, soorlu Ilulissani politiit. 

- Kinguaassiutitigut atornerlunneqarsimasut kisitsisinngorlugit saqqummiuneqaraangata amiilaarnaannartumik amerlasarput, taamaattumik amerlasuujulluta arpaqatigiinnikkut takutikkusupparput meerartatta atornerlunneqartarnerat akuersaanngilluinnaratsigu, Nunatta Nipaani tusagassiortoq Salome Hansen oqarpoq.

Kikkulluunniit, inoorlaaniit utoqqarnut, 3 kilometerimik arpanissamut/pisuttuaqatigiinnissamut tikilluaqqusaapput arfininngorneq 13. maj, ullaap tungaani qulinut. 

Peqataasussat kingusinnerpaamik 15 minutsit sioqqullugit arpaffissami allatsissinnaapput. Illoqarfinni nunaqarfinnilu aallartiffissat arpaffissallu Nunatta Nipaata Facebookimi quppernerani takuneqarsinnaapput. 
Arpaqatigiinnerup aallartinnginneranit naammassinissaata tungaanut Nunatta Nipaa radiokkut toqqaannartumik aallakaatitsissaaq.

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!