KNR KNR pisortartaassaaq
– Ukioq ataaseq pissanganarluinnartumik KNR-imi suliaqareerlunga atorfiga qimanniarlugu nalunaarpunga, Sisimiunullu ilaquttannut angerlarnissara piareersalerlugu. KNR-ip ineriartorteqqinnissaanut peqataanera unammisassartaqarsimaqaaq, iluarisimaarluinnakkannillu piorsaanikkut angusaqarnerput nuannaarutigaara, Søren Lennert Mortensen oqarpoq nangillunilu: – Suliassara tassaasimavoq KNR-imi patajaatsumik ingerlatsilernissaq, nutaamik siunnerfeqalernissaq aammalu aallakaatitanik ineriartortitsinerup aallartinnissaa.
KNR-imi siulersuisut siulittaasuat oqarpoq: – Søren Lennert Mortensenip soraarniuteqarnera siulersuisuni ajuusaarutigeqaarput. Piffissap sivikitsuararsuup iluani KNR nutaamik siunnerfeqalersissimavaa, ineriartornerullu pitsaasup sivikitsuinnaq atorlugu anguneqarnera iluarisimaaqaarput. Siulersuisuni Søren peqatigalugu KNR-ip pisortassaanik ujaasilerpugut, naatsorsuutigaarpullu juullinngitsoq inuttassarsiuineq allagarsiunneqarumaartoq, sapinngisamillu piaartumik inuttalerniarneqassalluni.
– Sisimiunut maannakkut angerlassaanga, tassanilu inuunera aamma inissarsiuussisarfiutilittut siunnersortitullu atorfiga ingerlateqqissallugit. Minnerunngitsumillu sunngiffinni aalisarneq piniarnerlu uterfigeqqissavakka, KNR-ip pisortaa oqarpoq nangillunilu: – KNR-imi qamani nukik pigeriigarput nassaareqqipparput, ullumilu SULEQATIGIIUVUGUT nukittuut ineriartortitseqqinnissamut piumassusillit sapiissusillillu. KNR suleqatikkalu maqaasissavakka, tulluusimaarutigeqaakkali radiokkut TV-kkullu aallakaatittakkavut. Aamma siunissami knr.gl tassaassaaq Kalaallit Nunaannit nutaarsiassanik ujarlernialeraangama iserfigisartagassara.
Siulersuisut sinnerlugit
Nukaraq Eugenius
Siulersuisuni siulittaasoq
Apeqquteqarusuttut saaffigisinnaavaat Siulersuisuni siulittaasoq Nukaraq Eugenius, telefon 556227 imaluunniit Pisortaq Søren Lennert Mortensen, telefon 525331
