KNR-ip nutaarsiassaqartitsiviata qulingiluanut radio aviisi peerpaa
Aasaanerani radio aviisi ullaakkut arfineq-pingasunut qulingiluanullu aallakaatinneqartaraluarpoq, maannali pisarnermut uterpugut radio aviisilu aqagu ullaakkumiit arfineq-marlunut kingumut aallarteqqittalertussanngorpoq, nutaarsiassaqartitsivimmi pisortaq Alice Sørensen tallimanngormat Aasarpalaamut ima oqarpoq:
- Aasaanerani ullaakkut arfineq-marlunut radio aviiseqarneq ajorpugut, taannali ataasinngorpat aallarteqqissaaq, aammami maqaasinartaqigami, uteqqippat iluassaqaaq, Alice Sørensen oqarpoq.
Radio aviisi ullaakkut arfineq-marlunut aallarteqqittalertussanngoraluartoq suli aamma allatulaaq aaqqiisoqarpoq.
Nutaarsiassalerisut suli ikippallaarput
Upernaap ingerlanerani tusagassiortut arlallit piffissap sivikitsuinnaap iluani allamik misileerusullutik allamik suliffittaarmata nutaarsiassaqartitsivik tusagassiortunik amigaateqalerpoq.
Tamatumalu kinguneraa radio aviisimi Qanoruumi. KNR.gl-milu nittartakkakkut allaaserisat appartinneqartariaqalermata.
AAMMA ATUARUK KNR-imi Nutaarsiassaqartitsivik upernaamut sivikilliillunilu ikilisaasoq
Mannali tikillugu tamanna ilorraap tungaanut aallarsimanngitsoq erseqqissaatigineqarpoq:
- Ukiorli sulisoqarnikkut kipiluttunartorsiorpugut suli aamma maannamut taamaappoq, ajoraluartumik pitsaanerulinngilaq, taamaammat qulingiluanut radio aviiseqartassanngikkallarpoq, Alice Sørensen oqarpoq.
Allatut oqaatigalugu, tassa ullaakkut arfineq-marlunut, arfineq-pingasunut, ullup-qeqqanut aammalu arfinernut radio aviisit aallakaatinneqartassapput.
Tassalu imaappoq, unnukkut radio aviisi aqagu ullaakkut arfineq-marluniit toqqaannartumik aallakaatinneqaqqittalissaaq, aasallu ingerlanerani ullup-qeqqanut radio aviisip unnukkut aallakaateqqinneqartaraluarnera aqagumiit unissalluni.
Taannaannaanngilarli aammali Qanorooq toqqaannaqqittalissaaq.
- Qanorooq aamma toqqaannaqqittalissaaq sivitsoqqilaassallunilu 15-20 minutsit missaanni aallakaatinneqartarnissaa naatsorsuutigisassavarput, nutaarsiassaqartitsivimmi pisortaq Alice Sørensen oqarpoq.
