KNR naammassisaqarnissamut isumaqatigiissutitaqanngitsumik ingerlasoq

KNR - Kalaallit Nunaata Radioa TV-alu - Namminersorlutik Oqartussanut naammassisaqarnissamut isumaqatigiissutaa 2010-miilli nutarterneqarsimanngilaq. Aviisi Atuagagdliutit ullumi saqqummersoq taama allaaserisaqarpoq.
Allattoq Karsten Sommer
januaarip 28-at 2015 05:05
Nutserisoq Simon Uldum -

KNR-ip tugasassiorfittut innuttaasunik kiffartuussisussatut naammassisassai naammassisaqarnissamut isumaqatigiissummi aalajangersagaapput.
 
Isumaqatigiissutillu pineqartup nutarterneqarnissaa KNR-ip ukiuni pingasuni maannamut utaqqisimavaa. Isumaqatigiissut maanna atuuttoq 2010-imi isumaqatigiissutigineqarpoq 2012-imilu decembarip qaammataani atuukkunnaarluni.
 
Ajornartorsiutaasorlu Namminersorlutik Oqartussat Kultureqarnermut Naalakkersuisoqarfianni pisortap Mikael Kristensenip nassuerutigaa.

Pisut assigiinngitsut pissutaapput
- KNR-ip 2013-ip aallartinnerani pisortartaarnissaa utaqqeqqaarparput. Taava qinersinissaq suaarutigineqarpoq, kingorlu KNR-ip siulersuisuisa aaqqissugaanerat pillugu inatsisissatut siunnersuummik saqqummiussisoqarluni. Taava ukiaq aamma qinersinissamik suaaruteqartoqaqqippoq, naalakkersuisoqarfimmi pisortaq Atuagagdliutinut nassuiaavoq.
 
- KNR-ilu maanna aamma nutaamik pisortartaaqqittussanngorpoq. Naammassisaqarnissamulli isumaqatigiissutissap nutaap upernaaq manna naammassineqarnissaa pilersaarutigaarput, Mikael Kristensen neriorsuivoq.
 
Kultureqarnermut naalakkersuisuusimasup Mimi Karlsenip Inuit Ataqatigiinneersup, KNR-imut isumaqatigiissutip suli inissinneqarsimannginnera tupigivaa.
 
- 2013-imi januaarimit 2016-imi januaarimut naammassisaqarnissamut isumaqatigiissusiortoqarsimanera aningaasanut inatsimmi kingullermi 2014-imut atuuttumi allassimavoq. Naalakkersuisut  naammassipallattariaqalerpaat, aamma aningaasanut inatsimmi sooq kukkusumik allaqqasoqarnersoq apeqqutiginiarpara, Mimi Karlsen Atuagagdliutinut oqarpoq.
 
KNR-ip pisortaanerata Søren Lennert Mortensenip taamatut inissimasoqarnera eqqissisimasumik tiguaa.
 
- Ajornartorsiutaanersoq politikerinut apeqqutigissavarsi. Allatut pisoqarnissaata tungaanut isumaqatigiissut pisoqaq naapertorlugu ingerlaannassaagut, aviisimut taama oqarpoq.