KNR kisiartaalluni kalaallinik aaqqissuisoqarpoq

Qanoruup nuna allamiumik aaqqissuisortaalernera Sermitsiaq.AG-mi tusarliunneqarniariartoq nittartakkap oqallittarfiani qallunaamik qullersaasussamik atorfinitsitsisimaneraaneq pillugu inuit kamaammersimaaqalutik akerliunerarlutik allaqattaartuatsianngorput. Kamaammersimaarnerli pissutissaqanngilaq.
januaarip 04-at 2013 12:38

Nunatsinnimi tusagassiorfiit annerusut akornanni KNR kisiartaalluni kalaallinik aaqqissuisoqarpoq, KNR-imilu aaqqissuisut arfineq pingasuusut akornanni ataasiinnaq qallunaartaavoq. Tassa Sermitsiaq.AG-mi ilanngutassiap, isornartorsiuinerit KNR-illu atorfinitsitsiniarneranut sakkortuumik akerliliisut KNR-imi nutaarsiassaqartitsinermut pisortap eqqumiigaa, kamaammersimaarnerlu pissutissaqarluarnerariarlugu kukkusumut tutsinneqarsimasoq tikkuartuullugu.

Sermitsiarmi qallunaaginnavinnik aaqqissuisoqarpoq, AG qallunaaginnarnik aaqqissuisoqarluni, Sermitsiaq.AG-lu aamma qallunaamik aaqqissuisoqarluni. Tusagassaqartitsiviillumi taariikkatta akornanni aaqqissuisut ilaat Danmarkimi allaat najugaqartuullutik. Sermitsiaq qallunaamik pisortaqarportaaq, siulersuisunilu siulittaasoq qallunaajulluni. Allaammi Nuuk TV qallunaamik aaqqissuisoqarpoq. KNR-imili aaqqissuisut arfineq pingasuusut akornanni ataasiinnarmik qallunaartaqarpoq, Qanoruumilu sulisut 16-iusut akornanni ataasiinnaq qallunaajulluni.

Aamma KNR-ip siulersuisuini siulittaasoq kiisalu KNR-ip pisortaa tamarmik kalaaliupput. Tassa tusagassaqartitsivinni qallunaat sunniuteqarnerujussuisa kamaatigineqarnerini KNR-ip taamatut pisuutinniarneqarnera KNR-imi tusagassaqartitsinermut pisortaq ima qisuariartippaa.

- Kalaallit Nunaanni tusagassaqartitsivinni kisiartaalluta Kalaallit Nunaanni inuiaat akulerussuussimanerannut naapertuuttumik sulisoqarpugut. Sulianut tunngassutilinnut isornartorsiuinerit nuannarilluinnartuuakka, Sermitsiaq.AG-mili taamarsuaq kamaammersimaarneq kukkusumut tutsinneqarpoq. Uagummi tusagassaqartitsinerup silarsuaani kisiartangajaalluta kultoorip tunuliaqutaatut inissisimavugut, Qanoroorlu kisiartaalluni kalaallisut oqaatsit kisiisa atorlugit tusagassaqartitsiviusuulluni, KNR-imi nutaarsiassaqartitsinermut pisortaq Mikkel Bjarnø Lund oqarpoq.

Tusagassiorfinnilu qallunaat sunniuteqarnerujussuisa ajornartorsiutaanerata eqqartorneqarnera pissusissamisoornerarpaa eqqortuunerarlugulu. Taamatulli isornartorsiuiniaraanni KNR pisuutinneqartariaqarsorinngilaa:

- Aviisit maanna ulapputileruttorput, inuillu isornartorsiuineri pillugit uanga qanoq oqaaseqarfigerusunnerikka AG-miit apersorneqarusoqalunga. Imalli oqaannassaanga: Inuit kamaammersimaarneri isornartorsiuinerilu paasisinnaalluarpakka, ilami tusagassaqartitsivinni qallunaaginnarnik aaqqissuisoqarneri pisortaqarnerilu Kalaallit Nunaannut, kalaallillu kultooriannut ajornartorsiutaavoq annertooq, uagullu KNR-imiittuusugut ajornartorsiut tamannarpiaq eqqummaariffigilluartuugipput nittarsaakkusupara. Uagummi nunatta innuttaasa amerlassusaannut naapertuuttumik sulisoqarpugut, tamannalu asuliinnaanngitsoq periuseralutigu. Taamaammat kamaammersimaarneq pissutissaqarluartoq eqqortunut tutsinneqartariaqarsoraara, aviisillu tamatuminnga nassuiaassuteqartariaqarsoralugit, Mikkel Bjarnø Lund oqarpoq.

Qanoruumilu qallunaamik aaqqissuisooqataalersoqarnissaa ima itisilerlugu:

- Taama atorfinitsitsineq Qanoruup imarisaasa pitsanngorsarneqarnissaanik siunniussaqarsimanitsinnik aallaaveqarpoq. Aaqqissuisunngortussarmi aaqqissuisut pingajorissavaat, taakkulu suleqatigiillutik Qanoruup pitsanngorsarneqarnerani suleqatigiittussaassallutik. Una aaqqissuisooqataalersussap pikkoriffigisai aaqqissuisooreersunut Arnaq Nielsen-ip, Bikki P. Kleist-illu pikkoriffigeriigaanut tapertaasussaapput, tassalu Qanoruup sutigut tamatigut pitsaanerulernissaanik siunertaqaannarluni, KNR-ip nutaarsiassaqartitsiviani pisortaq Mikkel Bjarnø Lund taama naggasiivoq.