KNR isornartorsiorneqarpoq

aggustip 02-at 2005 10:32

Radioavisimi danskinik aasaanerani tusagassiortussaaleqisoqarnera pissutigalugu nutaarsiassat danskisoortut aggustip qaammataani ikilineqarnerat pillugu oqallinnermut Sinerissami Tusagassiiviit Takusassiiviillu Kattuffiat maanna akuliuppoq.

- KNR atuarfiugaluarpat ilinniartitsisullu soraarniuteqarsimallutik, atuartitsinissat amerlanerpaartaat qaammat naallugu taamaatinneqarnissaat sulissutigineqarnavianngikkaluarpoq, piaarnerpaamilli taartaasussarsiortoqarsimassagaluarluni. Sinerissami Tusagassiiviit Takusassiiviillu Kattuffianni siulittaasoq Ivalo Egede tusagassiutinut taama allappoq.

Ivalo Egede allappoq, KNR innuttaasunut sullissisuummat pisussaaffeqartoq, taamaattumillu Qanorooq aasaq naallugu matoqqasarmat, pisortat aallakaatitsiviata nutaarsiassanik nunatsinneersunik nunanit allaneersunillu ingerlatitseqqiisarnissaa pisariaqartinneqarnerulersartoq.

KNR-ip ingerlatsisuinut oqaaseqartitsiniaraluaratta iluatsinngilarput.