KNR-ip siulersuisui ilisimasaqarluartuussapput

Inatsisartuni amerlanerussuteqarluartut isumaqarput, KNR-ip siulersuisui ilisimasaqarluartuusariaqartut. Radiukkut tv-kullu aallakaatitsisarneq pillugu inatsisartut peqqussutissaattut Naalakkersuisut siunnersuutaat ullumi oqaluuserineqarmat, Demokraatit kattusseqatigiillu taaseqataangillat.

Ilisimasaqarluartunik oqalunnermi pineqarput KNR-ip siulersuisuinik toqqaasarnermi toqqarneqartut tusagassiornermik, aningaasarsiornermik, suliffeqarfinnillu ingerlatsinermik ilisimasaqartariaqarnerannik Naalakkersuisut oqariartuuteqarmata. Peqqussutissatullu siunnersuut aappassaaneerlugu ippassaq oqaluuserineqarmat Siumut IA Atassullu isumaqataaput, Demokraatit kattusseqatigiillu taaseqataangitsut.

Siumup oqaaseqartua Doris Jakobsen oqarpoq KNR-ip siulersuisoqarnerata nutarerneqarnissaa pisariaqassasoq, ilisimasaqarluartuusariqartullu soorlu tusagassiornermik.

-Kattuffiit peqatigiiffiillu aamma aallartitaqarnissaat isumaqatigilluinnarparput, Doris Jakobsen(S) oqarpoq.

Georg Olsen(IA) oqarpoq, soorlu Danmarkimi periuseq tamanna atorneqarmat aamma nunatsinni KNR eqqarsaatigalugu ilisimasaqarluartunik siulersuisoqarnissaq pisariaqassasoq.

Demokraatineersoq Per Berthelsen taaseqataanginnerminnut tunngavilersuivoq, KNR suliffeqarfissuarnut allanut assersuuneqartariaqanngitsoq, inuiannut sullisisuunera pissutigalugu.

 -Suliffeqarfissuit tunisassiortut iluini ilisimasalinnik siulersuisoqassasoq pingaartipparput, knr immikkoortilluinarparput inuinnarnut attuumassuteqarluinnartumik suliffeqarfiummat, Per Berthelsen (D) oqarpoq.

 Kattusseqatigiinneersoq Willy Olsvig oqaluuserineqartoq siullermeerneqarmat peqataanginnami oqaaseqarsinnaanginnerarpoq.