KNR-ip pisortassaanik toqqaasoqarpoq

- Siulersuisuni Jacob Abelsen KNR-imi pisortassatut toqqarparput, KNR-illu ineriartortinnerata ingerlateqqinnissaani suleqatigilernissaa qilanaaralutigu.

- Ukiumi kingullermi annikigisassaanngitsunik pitsaasunik angusaqarsimavugut, Jacob Abelsenilu peqatigalugu KNR’ip ineriartortinneqarnera pilersaarutaareersut naapertorlugit nangeqqissavarput, KNR-ip siulersuisuini siulittaasoq Nukaraq Eugenius ilisimatitsivoq.

Jacob Abelsen Ineqarnermut, Sanaartornermut Attaveqarnermullu Naalakkersuisoqarfimmi immikkoortortami pisortatut atorfimmeersuuvoq. Atassut sinnerlugu qinersinermi kingullermi qinigassanngortikkaluarpoq aningaaserivilerinermillu Grønlandsbankenimi ilinniagaqarluni.

Søren Lennert Mortensen, ukiup aappaa avillugu atorfeqareerluni atorfimminit tunuartoq kingoraassavaa.

- Jacob KNR-imut tikilluaqqungaarparput, Suulullu KNR-imi sivikikkaluamik angusaqarfiulluartumilli sulisimaneranut qutsavigaarput, Nukaraq Eugenius oqarpoq.