KNR-ip inuusuttunut radio tuniniarpaa

KNR Voice allanngorartumik piumasaqaateqartumi aallakaatitsereerluni matuvoq, taamaalillunilu KNR-ip inuusuttunut iliiuseqarnini tunniutiinnarfigaa.

KNR Voicemi sulisut marluusut soraarsinneqarput, pisisussamilli nassaartoqarnissaanut, ukiulluunniit naanissaata tungaanut, aallakaatitsiinnarallassallutik.

KNR-illi pisortaata Jacob Abelsenip erseqqissaatigaa pisisussaasinnaasunik isumaqatiginninniarlutik.

Aningaasanik aqutsineq imminut ataqatigiinngilaq

Inuusuttunut iliuuseqarnerup ajutoorneranut pissutaavoq radiop ingerlanneranut aningaasartuutit isertitallu imminnut ataqatigiinnginneri. Radiokanali ukiumut 1 million koruuneqartussatut naatsorsuutigineqarsimavoq. Taakkulu ussassaarutinit isertinneqartartussatut, taamaalillunilu KNR-ip aallakaatitassiaanut allanut sunniisussaanngitsutut naatsorsuutigineqarsimagaluarpoq.

Aamma atuaruk KNR-ip najukkami radio Voice of Greenland matugallarpaa

Aningaasartuutit matussusernissaat iluatsissimanngilaq taamaammallu KNR-ip siulersuisuisa kanali tuniniarniarlugu aalajangerput.

Aamma atuaruk Malittarisassat akerleriittut KNR-ip inuusuttunut aallakaatitsivia eqqorpaat

Namminersorlutik Oqartussat Telelu aaqqiissutissanik assigiinngitsunik nassaarniarlutik ataatsimeeqatigisaqattaarsimagitsik, KNR-ip pisortaa oqarpoq, aaqqiissutissamilli isumaqatigiissuteqartoqarsinnaasimanngilaq.

Inuusuttut puiorneqarsimapput

KNR Voicep sammineqarnera januaarip qaammataani aallartippoq, taamani KNR-ip pisortarisaata Søren Lennert Mortensenip radiop Voice of Greenlandip 500.000 koruunilerlugu pisiarinera avammut nalunaarutigimmagu.

Taamani KNR-ip radiomik namminersortumik pisinini inuusuttunut aallakaatitassianik amigaateqarnermik tunngavilerpaa.