KNR-imi tusagassiortoq nersornaatisivoq

Tusagassiuinermi Suliallit Peqatigiiffiat arfininngormat ataatsimeersuarami akissarsisitsivoq. Inga Egede tusagassiortutut suliarilluakkanik suliaqartartutut, sapiitsutut aallakaatitassaminullu piareersarluartartutut toqqarneqarpoq.

- Tusagassiortuuvutit tamatigoortoq. Uteriitsoq, naammagittartoq, peqqissaartoq, piareersarluartartoq sukannersorlu. Taakku piginnaanitit, KNR Radiomi ukiuni tallimani atorfeqarninni, oqartussaasut inunnut nalinginnaasunut pissusilersuutaat naleqqutinngitsut arlalissuit qulaajartarpatit, Tusagassiuinermi Suliallit Peqatigiiffianni siulittaasoq, Mariia Simonsen, Inga Egedemut oqalugiaammini ilaatigut taama oqarpoq.

- Aallakaatitassiarpassuatit pissutigalugit inatsisiliat suliallu allanngortinneqarsinnaasimapput. Suliamut atatillugu suna alla kissaatigineqarsinnaava inuiaqatigiinni sanngiitsut, kikkunnilluunniit illersorneqanngitsut inuunerat oqinnerusunngortissallugu, Mariia Simonsen aamma oqarpoq.

Tusagassiuinermik Suliallit Peqatigiiffianni siulittaasup assersuutitut ilaatigut taavaa, angutip Narsarmiup innarluutillip atugai qitiutillugit Inga Egedep aallakaatitani arlalinni sammisimasaa. Angut inuunermi sinnerani nukillaaqqasussatut nalilerneqarsimagaluartoq - ullumikkulli pisussinnaavoq.

Tusagassiortutsialattut akissarsisinneqartussatut toqqarneqartut sinneri makkuupput:

Qanoruumi aaqqissuisoqarfik, ulluinnani unammilligassaqaraluaqalutik ataqatigiinnerat, suleqatigiillu akornanni anersaaqarluarneq, tunngavilersuutaapput.

Radioaviisimi aaqqissuisoqarfik, Tuullik pillugu ilanngutassiisarnerat sukumiisoq, tunngavilersuutaalluni.

Sermitsiami aviisiliortoq, Kurt Kristensen, aviisimi ilanngutarpassui aviisilioriaasialu pillugit.

Inuusuttunut atuagassiami nutaami, Toornara-mi, aaqqissuisut, nutaaliornerat pissutigalugu.

Kiisalu Vivi Sørensen, inuusuttunut nutaaliorluni aallakaatitassiaa, Labrador' Kangian' pillugu.