KNR KNR-imi nutaarsiassat sarsuasut
Suliassaq pilersinneqarnialermat KNB KNR-lu sivisungaatsiartumik suleqatigiipput. Suleqatigiinnerup kingunerisaanik KNR-imiit nutaarsiassat paasissutissallu allat illoqarfiit annersaanni Nuummi siammartinneqarsinnaanngorput, tamannalumi illoqarfiup qeqqatigoortunut nuannersuussaaq.
”KNR-ip sullissaminut malunnarnerulernissaa anguniarlugu taama iliuuseqarpugut. Neriuutigaarput kikkut soqutiginnittut tamarmik nutaaliornitsinnut siunnersuuteqarsinnaassasut isummanillu tunioqqaasinnaassallutik” taama KNR-ip pisortaa Søren Lennert Mortensen oqarpoq. Imatullu nangippoq:
”Inuiaqatigiit sutigut tamatigut paasitinneqarluartartut akornanniippugut. Siunissaq eqqarsaatigalugu Brugsenip eqqaani loppemarkedertartut tassaalissapput nunami maani pissutsinik paasisimasaqarnerpaajusut.
Qulliit atorlugit nutaarsiassaleriffimmi piseqqusaaruteqassanngilaq
Qulliit atorlugit nutaarsiassaleriffiuutigalugu paasisitsiniaasarfimmi saqqummiussisussatuaavoq KNR, tassami sarsuatitsivimmik atuisinnaasutuaq tassaammat KNR. Pingaarnerutillugit saqqummersinneqartassapput KNR-mit nutaarsiassat aammalu radiokkut tv-kullu aallakaatitassat. Aammattaaq inuiaqatigiinnut paasissutissat pingaaruteqartut tassuuna saqqummersinnaapput, soorlu tamanna nunarsuarmi illoqarfiit pingaarnersaanni ilisimaneqareersoq.
Saqqummersinneqarsinnaasut ilaattut eqqarsaatigaagut sinerissami illoqarfinni assigiinngitsuni silap qanoq inneri. Takorluuilluarsinnaanngissuserput immaqa matumani kisimi killilersuisuussaaq.
Qulliit atorlugit nutaarsiassanik paasissutissanillu ”ikaartarfiusami” allassimasoqartalernissaannut tunngatillugu apeqqutaasinnaasut isumassarsialluunnit uunga ingerlatinneqassapput Claus Nissen cln@knr.gl Claus Nissen taamatut suliniuteqarnermi aqutsisuuvoq. Aamma KNR-ip pisortaa Søren Lennert Mortensen smo@knr.gl saaffigineqarsinnaavoq.