KNI nunaqarfinnut sullissisunngussaaq

novembarip 01-at 2004 12:08

Nunaqarfinnik pilersuinermi KNI aqutsisunngussaaq, taama Inatsisartuni amerlanerussuteqartut, Siumut, Inuit Ataqatigiit Atassullu isumaqarput.

Amerlanerussuteqartunit nunaqarfinni tunisassiornikkut Nuka A/S-p ingerlatsinerata nunaqarfiillu Royal Arctic Bygdeservice aqqutigalugu pilersorneqarnerisa ingerlatsiveqarfimmit ataatsimit tassalu KNI-mit tiguneqarnissaa aalajangiuppaat.

Inatsisartut ippassaq ataatsimiinneranni tamanna amerlanerussuteqartunit naqissuserneqarpoq.

Amerlanerussuteqartulli taamatut ingerlatsilernissap pitsaaqutaanik arlalissuarnik tikkuartuigaluartut Inatsisartuni ilaasortat ilaannit taamatut aaqqiiniarneq ernumanartoqartinneqarpoq.

Ilatigut nunaqarfinnik pilersuineq umiarsuaatileqatigiinnit allanit tiguneqarpat maanna pilersuinermi sulisorineqartut 40-nit amerlanerusut suliffissaarussinnaanerat ernummatigineqarpoq.

Kattusseqatigiinnit Villy Olsvig-ip pingaartumik kalaallit umiartortut nunaqarfiit kiffartuunneqarneranni atorfissaqartinneqanngitsoornissaat annilaanngatiginerarpaa, ilallugulu nunaqarfiit nutaamik sullinneqalerneranni maannamut sullinneqarnertik qillugileratarsinnaagaat, Villy Olsvig oqarpoq. Kisianni naalakkersuisut siulittaasuata Hans Enoksenip akissuteqarluni annilaanganissamut pissutissaqannginnerarpaa umiartortullu kalaallit sulisoriinnarnissaat sulissutigineqassasoq oqaatigalugu.

Nunaqarfinnik imaatigut pilersuineq KNI-ip 2006-mi tigussaavaa, tassanilu pilersuinerup norsket umiarsuaatileqatigiiffiannit ingerlanneqarnissaa KNI-mit pilersaarutigineqarpoq.