KNI A/S-ip ataani Pilersuisumi nammineq sulisuminut sammititaminik niuertunngornianik aallartitsivoq, qaammatinik qulingiluanik sivisussusilimmik Sisimiuniilluni atuagarsornertalimmik katillugit pingasoriarluni niuertunngorniartoqarsinnaanngorluni. KNI A/S tusagassiuutinut taama nalunaaruteqarpoq.
Sulisut aqqaneq-marluk atuagarsornertik Sisimiuni ulluni makkunani aallartippaat, qaammatinilu tulliuttuni qulingiluani tassa niuertunngorniassallutik.
Angutit arfineq-pingasut arnallu sisamat ilinniarnertik aallartippaat, ukiui agguaqatigiissillugit 43,5-iulluni.
Ilinniartut suleriusissiornermut, niuernermut pisisartunullu tunngasunik ilisimasaat paasinninnerallu nukittunerulersinniarneqarlunilu annerulersinniarneqarpoq, maannalu ilinniartuutigineqartut pisiniarfinnik ingerlalluartunik ingerlatsinermik ukiuni arlalinni misilittagaqareerlutik. KNI tusagassiuutinut nalunaarummi taama allaaserisaqarpoq.
