KNAPK: WWF-imit nikassarneqarpugut

Pinngortitaq pillugu nunarsuaq tamakkerlugu suliniaqatigiiffiup WWF-ip Qaanaami qaleralinniarneq pillugu oqaaseqarnera tujorminarpoq.
marsip 10-at 2016 05:50

WWF-ip Qaanaami qaleralinniarneq pillugu akerliliinera aalisartut piniartullu kattuffiata KNAPK-p tusagassiorfinnut ippassaq pingasunngornermi nalunaaruteqarluni sakkortuumik akerlilerpaa.

- WWF-imit tusaasat atuakkallu assut tujorminarput, tunngavissaqanngitsut kusanaatsuusut aalisartunut piniartunullu Kalaallit Nunaanniittunut tamanut nikassaasuusut, Toku Oshima Qaanaami piniartut sinnerlugit taama oqarpoq.

Aamma atuaruk Krusep nalunaaruteqarnera WWF-ip iluaraa

Tamatumunnga peqatigitillugu, naalakkersuisup Karl-Kristian Krusep (S) WWF-imik isornartorsiunera aalisartunit piniartunillu ilalerneqarpoq.

KNAPK-p siulittaasuata Henrik Sandgreenip Qaanaami qaleralinniarnerup aatsaat aallartisaleruttornera erseqqissaatigaa. Aamma Qaanaami tunisassiorfiliortoqartinnagu qaleralinniarnerup annertusinissaa naatsorsuutigineqarsinnaanngitsoq oqaatigaa.

- WWF kattuffissuuvoq nunarsuaq tamakkerlugu 6.000-it sinnerlugit sulisulik, ajoraluartumillu takornartariunnaarparput, immikkoortortaqarfii namminersortut sukkut tamaana nunatta aalisartuinik akornusersuisarnerat, Henrik Sandgreen oqarpoq.

Aamma atuaruk Krusep WWF isumaqatiginngilaa

Aamma ilisimatsissutigaa KNAPK-p avatangiisit pillugit WWF-imik "suleqatigiilluarnerigaluani" tamakku pissutigalugit kipitittariaqarsimagaa.

WWF-ip ammasumik pissuseqarluni aalisapiluttoqarneranik oqaaseqarnerminut uppernarsaatissanik saqqummiussinissaa aalisartut piniartullu kattuffiata ujartorpaa.