KNAPK-p Great Greenlandillu puisit amii pillugit isumaqatigiissutertik nutarteraat

Puisit amiinik tunisinermut isumaqatigiissut nutaaq KNAPK-p siulittaasuannit Henrik Sandgreenimit, Great Greenlandillu siulittaasuanit Ditte Sorknæsimit marlunngormat maajip ulluisa 24-anni atsioqatigiissutigineqarpoq, isumaqatigiissullu 2016-ip sinneranut atuuttussaatinneqarpoq:

- KNAPK suleqatitsinni pingaarnersaavoq, taamaammat isumaqatigiissut nutaaq atsioratsigu nuannaarpunga, qilanaaraaralu maanna siunissamilu pitsaasumik attaveqatigiittarnissaq, Ditte Sorknæs taama oqarpoq.

Isumaqatigiissummi siullermi ilaatigut piniartut 4000 koruunit nalinginut tunisaqaqqaarlutik akilerneqartarnissaat piumasaqaataavoq, KNAPK-miilli tamanna akueriumaneqanngilaq, piumasaqaallu taanna isumaqatigiissummi nutaami atorunnaarsinneqarluni.

Natsiilli amiinik tunisineq Ilulissaniit kujammut Qaqortoq ilanngullugu suli matoqqatinneqassaaq.

Aataat natsiillu amii 48.000-it ukioq manna 2016-imi tunisassiarineqarsinnaanissaat Great Greenlandip neriuutigaa.