KNAPK: Naalakkersuisut pitsaanerusumik nassuiaasariaqalerput

Aalisariutit nutaanngilisimasut isaterneqarnissaannut aningaasat 30 mio. kr. aappaagu karsimiittuutigineqarlernissaannik, Aalisarnermut Naalakkersuisup, Finn Karlsenip Radioaviisimi ulloqeqqanut neriorsuinera upperiuminaappoq, tassami Aningaasanut Inatsimmi taama allassimasoqanngilaq.
Allattoq Apollo Jeremiassen
septembarip 04-at 2014 13:59

KNAPK-p siulittaasua, Henrik Sandgreen taama oqarpoq.

-Aalisariutit nutaanngilisut isaterneqarnissaannut Aningaasanut Inatsisissatut missigersuummi aningaasaliiffigineqarsimanngitsut eqqarsaatigalugu, KNAPK-mit upperilernavianngilarput aningaasat takusinnaanngisagut aallaavigalugit qinnuteqartarnissarput.

AAMMA ATUARUK Finn Karlsen: Aalisariutit isaterneqarnissaannut aningaasaateqarluarpugut

Aalisartut Piniartullu Kattuffianni siulittaasoq, Henrik Sandgreen oqarpoq.

Finn Karlsen Radioaviisimut ulloqeqqanut nassuiaavoq, KNAPK-p ataatsimeeqatiginerani aningaasaliinissamik neriorsuinnginnami.

- Aningaasaliinissamik immikkut ittunik KNAPK-mut tapiissuteqassallunga neriorsuinngilanga. Kisianni nassuiaappakka aningaasat atunngitsuukkat 30 million koruunit tungaannut amerlassusillit, inatsisit malillugit aappaagumut nuunneqartussaammata, taakkunanngaanniillu qinnuteqartoqarsinnaasoq oqaatigalugu.

Finn Karlsenip taama oqarnera tusareerlugu, Aalisartut Piniartullu Kattuffianni siulittaasoq sukumiisumik nassuiaasoqarnissaanik ujartuivoq imalu nangilluni oqarluni.
 
- Aalisarnermut Naalakkersuisup Aningaasaqarnermullu Naalakkersuisup avammut saqqummiussaat ataqatigiinngippallaarujussuarput, kattuffinnik tamanna paatsoorneqarsimasoq oqaatigalugu. Tamanna akuersaarneqarsinnaanngilaq.

Aalisartut Piniartullu Kattuffianni siulittaasoq, Henrik Sandgreen naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq