KNAPK: Aalisariaatsit nutaat pilersinneqassappata misissueqqaartoqartariaqarpoq
Nunatta imartaani aalisakkat assigiinngitsut 200-t sinnerlugit Pinngortitaleriffimmit nalunaarsorneqarsimapput.
Taamaakkaluartoq aalisakkat taakkua akornanni arfiniliinnaat tunisassiarineqartartut, Siumup siulittaasuata Kim Kielsenip isornartorsiorpaa. Tamanna allanngortariaqartoq aalisariaatsinillu nutaanik pilersitsisoqartariaqartoq ataasinngormat qineqqusaarnermini oqaatigaa.
KNAPK isumaqarpoq tamanna ajornanngitsuinnaanavianngitsoq.
- Taamatut niuernerpalaartumik illersorneqarsinnaasumik samminninniaraanni taava misissuineq annertunerusoq ingerlateqqaartariaqarmat, uumasulerisut misissuinerat ingerlanneqaqqaartariaqarput, KNAPK-mi pisortap tullia Tønnes Berthelsen taama oqarpoq.
Taassuma aamma oqaluttaraa, pissuussutinik siusinnerusukkut iluaqutigineqarsimanngitsunik iluaqutiginnittoqalertartoq, iluanaarutaajartulertartunik. Saattuaq 1990-ikkunni iluaqutigineqalerpoq. Maanna ilisimaaraarput, taanna nalituujusoq pisisartunillu piumaneqarluartoq.
- Soorlu aallussisut nioqqutissiortullu qulakkeersinnaagunikku una aalisagaq imartatsinniiginnassoq amerlassutsikkullu illersorneqarsinnaalluni taava aningaasaliinerit aatsaat aallartinneqarsinnaapput. Tassa taanna tupinnartuliaanngilaq, Tønnes Berthelsen oqarpoq.
