Kitaata sineriaata annersaani anorersuartorsuuvoq
Nuummi politiinit KNR-imut nalunaarutigineqarpoq, aqqusinertigut angallannerit pinaveersaarneqarnissaannik innuttaasut kaammattorneqartut, Nuummili Politeeqarfimmi pingaartup, Poul Petersenip naqissuserpaa, aqqusinertigut angallannerit inerteqqutigineqanngitsut.
Nuup Bussii A/S-imi ingerlatsinermi pisortaq, Rene Hansen, nalunaarpoq Nuummi bussit silarlunnera pissutigalugu ullaaq manna angallassinngitsut.
Nuuk unnuaq innaallagiaarukkaluarpoq
Nuummi unnuaq innaallagissatigut qamittoortoqarnerta kinguneranik qarasaasiatigut attaveqaatit taamatullu oqarasuaatit atorsinnaasimanngillat.
Kitaata ilarujussua silarluppoq taamaattumik Nuummi illoqarfinnilu allani atuarfiit meeqqeriviillu ammatinneqarnersut angajoqqaanit paasiniarneqarnissaat kaammattuutigissavarput.
