Kisitsisit siumut isummiuteriikkat pujaatsoortippaat

Kalaallit pillugit qallunaat siumut isummereertarnerat pissutaalluni Nunatsinnut tikeraarniartorpassuugaluit nangaalersarput. Nunatsinni takornariartitsinermut siunnersuisooqatigiit Visit Greenland misissuineq tunngavigalugu naqissusiipput naalagaaffeqatitta nunatsinni pissutsit paatsoorluinnarsimagaat.
Allattoq Noah Mølgaard
septembarip 27-at 2012 07:40

- Danmarkimi pisisartut soorlu USA-meersunut sanilliullugit ilisimasaqarnerupput, kisianni ilisimasat aamma siumut isummiuteriikkanik imaqarput, Visit Greenlandimi pisortaaneq Anders Stenbakken oqarpoq.

Misissuinermi qallunaat aperineqartut 40 procentii akipput: "imerajuttut, atornerluisut inuttullu ajornartorsiutillit" aperineqaramik " Kalaallit qanorittuusoraagit?". Misissuineq qallunaat 1.017-it peqataaffigisaat Visit Greenlandillu maanna saqqummiutaa taama oqariartuuteqarpoq.

Misissuinermi aamma paasineqarpoq aperineqartut affaat isumaqartut kalaallit qallunaanit imigassamik atuinerusut, naak qallunaat imigassamik atuinerugaluartut. Aperineqartut 43 procentii aamma isumaqarput kalaallit Danmarkimi najugallit affaat sinnerlugit ikiorsiissutinik ullormusianillu pisartagaqartut. Piviusorli tassaavoq 16 procentit taamatut pisartagaqartuummata amerlanerpaartaat imminnut pilersortuusut.

Siumut isummiuteriikkat taama ittut Nunatsinnut takornariarniaraluartunut nangaalersitsisartut Visit Greenlandimi isumaqarput.

- Inerniliunneqarsinnaasoq tassaavoq takornariarfissatut pilerigisaq inuttut ajornartorsiuteqarfiusutut, puiseeqqanik toqoraaffiusartutut allatigullu paatsuuinermik tunngavilimmik tusaamanerlukkaanni aningaasat Kalaallit Nunaat pinnagu allanut atornissaat eqqarsaatigineqarsinnaalluartoq, Anders Stenbakken oqarpoq.

Misissuinermi aamma paasineqarpoq qallunaat ukiut tallimat kingulliit ingerlaneranni nunatsinniissimasut siumut isummiuteriigaat qallunaanut allanut sanilliullugit ikinnerusut.

Anders Stenbakkenip naliliinera malillugu Danmarkimiit Nunatsinnut takornariartitsisarneq ilungersunartorsiorfiuvoq. Qallunaat takornariartartut ukiut pingasut tallimat kingulliit ikiliartorsimapput.

Taamaammat misissuineq maanna saqqummiunneqartoq atorlugu qallunaat kukkusumik isummersimanerat allanngortinniarneqarpoq.

- Aamma imatut oqaatigineqarsinnaavoq: Ajornartorsiutip qiterisaa tigoriartigu siumullu isummiuteriikkat allanngortinniarlugit tamakku pissutigalugit Kalaallit Nunaannut angalaniartunut nangaalersitsisarmata.

Misissuinermi paasisat Visit Greenlandimit tupaallaatigineqanngikkaluartut taamaattoq ataaseq Anders Stenbakkenip maluginiarpaa.

- Tassa amerlasuut suli isumaqarmata piniartut amerlanerit qaannamik angallateqartut. Taama isumaqartoqarnissaa ilimagisimanngikkaluarpara, Visit Greenlandip pisortaa oqarpoq.

Misissuinermi paasisat maanna saqqummiunneqarput qallunaat nunatsinnut takornariarusulersinniarlugit ukiaanerani piseqqusaarinissat aallartinngilaarnerani.