Inuussutissarsiutit

Kisermaassisuuneq oqallisissanngortinneqartoq

Royal Arctic Linep sullissinermi ilaanik kisermaassisussaatitaanini taamaatissallugu piareersimaffigigaa, pisortaaneq Verner Hammeken KNR-imut oqarpoq.

Allattoq Anton Gundersen Lihn, Sara K. Jakobsen

aggustip 24-at 2016 15:37

RAL-ip pisortaanerata umiarsuaatileqatigiiffik, Namminersorlutik Oqartussanit pigineqartoq, Nunatsinniit, nunatsinnut nunattalu iluani assartuinermi kisermaassisuunertik oqallisissanngortippaa.

Pisortaaneq Verner Hammeken naapertorlugu immakkut assartuinermi kisermaassisussaatitaaneq suli pissusissamisooraluarpoq, taamaattorli:

Aamma atuaruk RAL-ip kisermaassisussaatitaanermi taamaatinneqarnissaa piareersimaffigigaa

- Immakkut assartuinikkut sullissisarnitta kisermaassisuuffigiunnaarnissaa misissuissavarput. Kisermaassisussaatitaaneq tassunga tulluarnersoq oqallisigissallugu piareersimavugut, Verner Hammeken oqarpoq.

RAL-ip umiarsuaatai kisermaassisuuginnassanersut oqallisigineqassaaq, aammali nassiussanik tamakkiisumik sullissineq, containerit assartuinermilu sullissineq unammilleqatigiissuteqarfigineqarnissaat oqallisigineqassaaq.

Aamma atuaruk RAL unammillerneqartariaqartoq

Tamannalu RAL-imut inuiaqatigiinnullu iluaqutaasinnaasoq, pisortaaneq isumaqarpoq.

- Unammilleqatigiinneq, nalunngeriikkat malillugit, nioqqutissat akiinut pitsaasumik sunniuteqassaaq, siulersuisuni ilaasortanit tapersersorneqartoq.

Siulersuisuni siulittaasup Kuno Fenckerip Royal Arctic Linep kisermaassisussaatitaajunnaarnissaa aamma misissorlugu, nittartakkamut assartuinermut tunngasunut allaaserisaqartarfimmut ShippingWatchimut oqaatigaa.