Kirkegaardip Ilulissani mittarfiup tallineqarnissaa siunnersuutigaa
Ilulissanili mittarfiup taama naatsigisumik tallineqarnissaa naammaqqajanngilaq. Taama isumaqarpoq, Inatsisartut sanaartornermut ataatsimiititaliaani ilaasortaq, Jens-Erik Kirkegaard, Siumut, oqarluni Ilulissani mittarfik 2200 meterisut takitigisariaqartoq.
Ilulissani mittarfiup 2200 meterimut tallineqarnissaa, Jens-Erik Kirkegaardip aviisini assigiinngitsuni oqallissaarutigaa. Taamaalilluni Qaasuitsup Kommuniata kissaataata assiganik, Jens-Erik Kirkegaard kissaateqarluni.
Taassuma tunngavilersuutigaa, mittarfiup 2200 meterimut tallineqaratigut, tamanna timmisartuutileqatigiinnit pilerigineqarnerulernissaa. Killormulli mittarfik taamaallaat 1799 meterimut tallineqarpat tamanna timmisartuutileqatigiiffinnit naammagineqannginnissaa oqaatigalugu.
Tassalu tunngavilersuutit tamakku eqqarsaatigalugit, Ilulissani mittarfiup 2200 meterimut tallineqarnissaa kisimi eqqortuusoq, Jens-Erik Kirkegaard aviisini oqallissaarummini allappoq.
- Mittarfiup 2200 meterimut tallinneqarneratigut takornariat amerlanerit tikittalissapput, tamassumalu saniatigut billitsit akikinnerulissallutik taamatullu Nunatsinnut aningaasanik isaatitsiviunera annertusissalluni. Taamaattumik mittarfik taamaallaat 1799 meterimut tallineqarpat tamanna aningaasanik atuilussinnarnerussaaq, Jens-Erik Kirkegaard allappoq.
Ilulissani mittarfiup 2200 meterimut tallineqarnissaanik, Jens-Erik Kirkegaardip kissaateqarnermini tamassuma aningaasartuutissai qanoq isikkoqarnersut annertutigisullu siunnersuuteqarnermini puigorsimagunarpai, Naalakkersuisunut ilaasortaq, Knud Kristiansen oqarpoq.
- Aningaasat naammattut pigisuugutsigit mittarfiit 2200 meterimut tallineqassagaluarput. Aningaasartuutit 1799 meterimut tallineqarnerani 2200 meterimullu tallineqarnerani taakku akitigut assigiinngissusaat, Jens-Erik Kirkegaardip puigorsimagunarpaa, Knud Kristiansen aviisimut allaaserisamut akilluni ilaatigut taama allappoq.
Aamma allalluni, mittarfiit 2200 meterimut tallineqarneranni timmisartunut ilaasartut taama maanna ikitsigitillugit tamanna imminut akilersinnaanngitsoq aamma aningaasartuutinik matussusiiniarneq ajornassasoq allalluni. Aningaasartuutillu matussuserneqassappata ilaasunut akitsuut taamatullu timmisartut mittarfinnik atuinerinut akitsuut qaffagaatsiniarneqartariaqassasut, Knud Kristiansen allappoq.
Mittarfiit pillugit oqallinneq, Inatsisartut ukiamut ataatsimiinneranni taamatullu Sanaartorneq pillugu ataatsimiititaliami ilaasortat akornanni oqaluuserineqagaatsiarnissaa taamaalilluni aallartisarneqarpoq.
Ilulissani mittarfiup 2200 meterimut tallineqarnissaanik isuma Ilulissani, Uummannami aamma Upernavimmi Inuussutissarsiornermut Siunnersuisooqatigiinnit tapersersorneqartoq, aviisi Atuagagdliutit allappoq.
