Kingusinaartumik mianersoqqusineq IA-p isornartorsiorpaa

Taama nalunaaruteqartoqarnera ajunngilaq, kingusinaarujussuarporli. IA-p politikkikkut oqaaseqartartua Atassummut taama akissuteqarpoq.

Atassummeersoq Steen Lynge sapaatip akunnerani siusinnerusukkut avaleraasartoorniarnerup isumalluutigineqarpallaarneranut isornartorsiuereersorlu taama akissuteqartoqarpoq.

Avaleraasartoorniarneq maanna unitsinneqareersimalerpoq, pisarineqartussatullu naatsorsuutigineqartut pingajorarterutaannaat pisarineqarlutik. Aningaasanut inatsimmut tamanna pitsaanngilaq, avaleraasartoorniarnermimi akitsuutinit 81 millionit koruuninik isertitsinissaq missingersuusiorneqaraluarmat.

-  Taamaattumik Atassut isumaqarpoq, siunissami tamanna mianersuunneqarnerusariaqartoq, taamaaliornermi aningaasanut inatsimmi angusanut iluaqutaassammat, Steen Lynge ilaatigut oqarpoq.

Aamma atuaruk Steen Lyngep aningaasanut inatsit piviusorsiornerusoq kissaatigaa

Partiip naalakkersuisoqataasup Atassutip mianersoqqussuteqaleriataarnera, partiimi illuatungiliuttuni Inuit Ataqatigiinneersup Aqqaluaq B. Egedep tupigusuutigaa.

Inatsisartut aningaasanut inatsisissaq 2015-imoortoq pingajussaanneerlugu oqallisigimmassuk, partiinit naalakkersuisoqatigiinneersunit ataasinnguamilluunniit oqaaseqarfigineqannginnera taassuma oqaatigaa.

- Aatsaat massakkut - ukiup naanissaa qanilligatsigu, pissutsit qanoq innerat Atassutip paasilerpaa. Aatsaat maanna mianersoqqussuteqarniarsarilerput. Taama nalunaaruteqartoqarnera soorunami nuannaarutigaarput - kingusinaarpallaarujussuarporli, Aqqaluaq B. Egede allappoq.

IA-p politikkikkut oqaaseqartartuata Naalakkersuisut aamma isornartorsiorpai, taakkumi aningaasanut inatsisissap isumaqatigiinniutigineqarnerani matoqqavallaarsimapput, akissuteqarumassanatik pissaaneqarniarpallaarlutillu.