Imigassamut inatsisissaq Kingunerisassai Brugsenimit Pisiffimmillu ernummatigineqarput
- Inatsit taama saqqummiunneqarnermisut isikkoqartillugu akuerineqassappat, sunik kinguneqarnissaata maluginiarneqarnissaa anguniarparput, Nuummi Brugsenimi tuniniaanermut pisortaq Jes Nyborg taama oqarpoq.
Imigassamik tuniniaaneq tallimanngornermi ullaap tungaani ammarneqarmat, pisiniarfimmi imigassat inissisimaffiat assiaqusersorneqarpoq.
- Assiaqusersuinerinnaq kisimi pineqannginnera politikerinut paasitikkusukkaluarparput. Kingunenrisassaassami aamma ilagivaat inuusuttut sulisorisagut 18-it inorlugit ukiullit sulisoriunnaartariaqassarivut
Pisiffimmi tunininaanermut pisortaq Heine Stilling Jensen oqarpoq,
Imigassamut inatsisissaq akuerineqassappat, pisiniarfiit imigassaarniarfitik martsip aallaqqaataani 2018-imiit assiaquserlugit imigassat aalakoornartortallit tuniniartalissavaat
Nioqqutissat allarpassuit akiisa qaffattariaqalernerannik kinguneqarsinnaasoq pisiniarfiit aarlerisaaripput.
Pisiniarfiutigut aallaavigalugit, maani Nuummiinaanngitsoq sineriammili pisiniarfiutigut ilanngullugit, inatsisissap piumasaqaatai pivisusunngortinniarlugit immikkoortortaqarfiit allanngortiternissaat aningaasartuuteqartussaassavagut. Taamaammat pisisartutta nioqqutissarpassuatsigut malugissagaat qularutissaanngilaq, Jes Nyborg Nuummi Brugsenimi pisortaq taama oqarpoq.
Siunnersuutigineqartoq pillugu pisisartut assigiinngitsunik isumaqarput.
Arnajaraq Islandimi najugaqarsimavoq Islandimilu imigassanik tuniniaasarnerup aaqqissuunneqarnera ajorinagu.
- Ajorinngilara, inatsit taamatut ittoq Islandimi najugaqartillunga atorneqarpoq, assersuutigalugu niuertarfeqarpoq pequtaarniarfinnik, sikuerniarfinnik, sukkulaataarniarfinnik aamma imigassaarniarfinnik niuertarfinnik peqarpoq, Arnajaraq taama oqarpoq.
Pisisartup allap Gedion Jeremiassenip siunnersuutigineqartoq isumaqatiginngilaa
- Meeraanngilagut, aamma tusarpara sinerissami nunaqarfinni pissutsit taamalissasut, takorloorsinnaavara nunaqarfinni pisiarfinni mikisuni, soorlu Saarlumi Aappilattumi, taakkunani pisiniarfiit mikigaangaaramik, imigassanut assiaqutit pisiniarfinniit anginerussapput, meeraanngilagut, pisisartoq Gedion Jeremiassen taama oqarpoq.