Kinguaassiornermut tunngasumik sammisaqarneq iluatsilluartoq
Nunatsinni naartuersittartut kinguaassiutikkullu nappaatillit amerliartuinnarput. Taamaannera iliuuseqarfiginiarlugu Ilulissani atuartut atoqatigiinneq peqqissuserlu pillugit sapaatit akunneranni sammisaqarsimapput.
Atuartut ilikkakkatik namminneerlutik tallimanngormat oqaluttuaraat:
- Nukappiaqqat mulimikkut manngertunittartut taavalu niviarsiaqqat aaqalertartut.
- Kiagunnerit bumsininnerillu allallu, virsusit barakterissallu ilikkarpakka qanoq tamakkoqalersinnaanersut.
- Qanoq nuunuaqqat naap iluani alliartortarnersut qanorlu mannimmut iseriartortarnersut.
Atuarfik Jørgen Brølundimi 8. klassit Brian Petersen, Ane-Marie Fly Olsen Marc Olsenilu ilikkakkatik pillugit taama oqattuarput.
SPS-imi ilinniartut ilinniartitsisuliullugit
Kinguaassiornermut tunngasumik sammisaqartitsineq Perorsaanermik Ilinniarfiup, meeqqat atuarfiisa Ilulissanilu napparsimmaviup suleqatigiissutigaat.
Tassalu atuartut kinguaassiorneq pillugu perorsaasunngornianit sammisaqartinneqarput. Ilaatigut inuusuttuaranngulerneq, kinguaassiuutitigut nappaateqarneq, naartunaveersaarneq, naartuneq naartuersittarnerlu sammivaat.
Ilinniartitsineq perorsaanermut tunngasunik sammisaqartitsinermik, saqqummiinernik oqallinnernillu imaqarpoq.
Timikkut attuuaqatigiinneq eqqarsaatigalugu atuartut killissatik ilinniarpaat nittartakkatigullu assinik ingerlatitseqqiisarnermi killissat sammillugit.
- Ilai eqqisserpasittorujuupput, sunaaffa naliginnaasuullunga taamaappasillutik, Ane-Marie Kristiansen Perorsaanermik Ilinniarfimmi ilinniartuusoq taama oqarpoq.
Atuartullu timertik pillugu ilikkagaqarsimanertik nuannaraat:
- Nuannerpoq paasisaqarnarlunilu, siunissami iluaqutigiumaarpagut, atuartoq Bentia Fisker KNR-mut oqarpoq.
Sammisaqartitsineq naggaserlugu atuartut angajoqqaaminnut ilikkakkatik pillugit saqqummiipput.