Kinaminik atorfinitsitsiniarneq nuannarineqarlunilu isorineqarpoq
Naak nunatsinni suliffissaaleqisut amerlagaluaqisut nunatsinneersut tamakkiisumik sulisinnaanerat killeqartoq, Royal Greenlandimi sulisoqarnermi ingerlatsisoq isumaqarpoq.
- Allatut ajornartumik taamatut iliussalluta aalajangersimavugut. Nunatsinneersut sulisorisinnaasagut naammanngillat, ukiorpaalunngortuni naammatsinniarsarisimagaluarpagut, kisianni naammattunik pissarsisinnaannginnatta taamaatut iliortariaqalersimavugut, Royal Greenlandimi sulisoqarnermi ingerlatsisoq Søren Olsen Damgaard taama oqarpoq.
Tamannalu Kalaallit Nunaanni Aalisartut Piniartullu Kattuffianniit nuannaartutigineqarpoq.
- Aalisartut tulaassuisinnaanerat aalaakkaanerusumik ingerlalernissaa qulakkeerniarlugu taamaaliortoqarnera tamatta nuannaarutigiinnartariaqaripput isumaqarpunga. Naak immaqa ilaannut, oqarta, mamaakkaluartoq, uggamassa nunatsinni suliffissaaleqineq taama annertutigisoq, KNAPK-mi siulittaasoq Henrik Sandgreen oqarpoq.
Kinamiunik nunatsinni atorfinitsitsinissaq siorna siunnersuutigineqaqqaarmat SIK isornartorsiuivoq, oqaaseqarninilu suli aalajangisimaannarlugu nalunaarpoq. SIK-p siulittaasua kinamit atorfinitsiniarneq pillugu siorna ima oqarpoq:
- Inuiaqatigiit tamarmik taanna ajorsarnerigaat, suliffissaaleqisoqarpoq maani nunatsinni annertuumik taakaaluartoq aamma sumiiffiit ilaanni aamma sulisussanik amigaateqartoqarpoq, taannalu inuiaqatigiinnut ajorsarnertut oqaatigineqartariaqarpoq, SIK-mi siulittaasoq Jess G Berthelsen taama oqarpoq.
