Atassut Kina siulittaasunngorusuppa?

Atassut ataannassappat siulittaasunngortussaq sukataartariaqavissagunarpoq. Atassummilu maanna siulittaasuugallartup neriuutigaa partii inuusuttumik siulittaasoqalissasoq. Siulittaasussatullu sassartussanik suli maannamut saqqummertoqanngilaq.
Allattoq Dorthea Johansen
februaarip 17-at 2017 10:41

Partii 1979-imi pilersinneqarnerata kingorna partii ingerlalluarsimaqaaq. Partiimi pilersinneqarami ingerlalluarsimaqaaq, imami ingerlalluarsimatigaaq, allaat partiini anginerpaalluni.

1979-imi qinersisoqarmat qinersisartut 42 %-ingajaannik taaguunneqarlutik. 
Ukiullu ingerlaneranni partiip qinersisartui amerliartoratik ikiliartuaarusaaginnavipput.

Qinersisartullu ima ikileriarsimatigaat, qinersinermi kingullermi, tassa 2014-inimi, 6,5 %-iinnarnik taaguunneqarlutik.

Atassutillu qinersisartuisa ikiliartorsimanerat partiimi siulittaasuusimasup nassuiaatissaqartippaa.

- Ugguuna tunngaveqarunarpoq taamanikkut anginerpaat ilaaneraninngaanniit nutartinngitsoorsimanera, tassa naluneqanngilaq Lars Chemnitzikkut Danielikkut ajunngilluinnartumik ingerlasimapput.

AAMMA ATUARUK Atassutip kinguariartornera ingerlaqqittoq

Tunualernerata missaani ilaatigut partiip iluani annertuumik saqitsaanneqartarsimavoq. Taamaalilluni immaqa qinersisartunik nuannarineqarsimanani, Gerhardt Petersen nassuiaavoq, nangillunilu.

- Ottokkut Ellennikkut annertuumik saqitsaassimapput Folketingimut tunngatillugu. Tamakku soorunami nipilersoqataasimassapput. Taavalu taassuma ilutigisaanik immaqa annertunerusumik nutartersimanani.
Imannak siulersuisut taavalu aamma partiimi aqutsisuusut inuusunnerusut periarfissinneqanngitsoorsimallutik pulanissaannut, siulittaasuusimasoq oqarpoq.

Pikkoriffigisimasaallu, tassa ersittumik assortuuttarnerit kingunerlutsitsisimapput.

 - Atassuminngaanniit pikkoriffigivallaartarsimavarput ammasumik ilaatigut assortuuttorsuanngortaratta partiilli allat iluminni mattullutik assortuuttarnerat, taakku ilinniarfigisinnaavagut, siulittaasuusimasoq Gerhardt Petersen oqarpoq.

Partii nukittorsarneqartariaqartoq

Politikkikkut anguniakkat assigiinngitsut partiillu siunnerfii assortuussutaasarsimaqaat. 
Partiillu sanngiifiisa nukittorsarneqarnissaat siulittaasuusimasup piffissanngorsoraa.

 - Neriuutigaara siulittaasunngortussaq kinannguugaluarnersoq immikkoortortaqarfiit sinerissamiittut nukittorsarnissaa annertuumik aallutissagaa. Taavalu minnerunngitsumik atassutip politikkia ersarissoq saqqummilaartissagaa.

Siulittaasussatut suli sassartoqanngitsoq

Partiimilu ukiut 38-it matuma siorna ingerlalluarsimaqisoq siulittaasussaaleqinnguatsiarpoq. Siulittaasussatummi qineqqusaartussanik suli sassartoqanngilaq.

- Massakkut siulittaasussamik sassartussamik suli saqqummertoqanngilaq. Aamma siulersuisuni ilaasortanngortanngorniarlutik qinigassanngortikkumasunik suli nalunaartoqanngilaq, siulittaasuugallartoq Qulutannguaq Berthelsen oqarpoq.

AAMMA ATUARUK Politikeri alla Atassummit aamma ilaasortaajunnaartoq

Neriuutigaali sassartoqassasoq.

 -  Kisianni ataatsimeersuarneq nalleriarpat ilimanarpoq aamma naatsorsuutigaara taassuma nalaani sassarrakkumaartut, siulittaasuugallartoq oqarpoq.

Piukkussusisoqarpoq

- Qaqortuminngaanniit piukkussallit nalunngilakka, taamaattumik neriulluarput, Gerhardt Petersen oqarpoq.

Kinali piukkunneqarnersoq oqaatigerusunngilaa.

Siulittaasuugallartullu inuusuttumik siulittaasunngortoqarnissaa neriuutigaa.

- Suu, kissaatigivara. Oqaatigiinnarsinnaavara inuusuttunik tapersersuissaanga, inuusuttut atassummi akisussaaffik tigoqqinnissaa kissaatigisorujussuuara, siulittaasuugallartoq oqarpoq.

 - Siulittaasunngortussaq annertoorujussuarmik suliaqartussaassaaq partii annikilliartoqqissanngippat, siulittaasuusimasoq Gerhardt Petersen naggasiivoq.