Visit Greenland: Kina niuerfiuvoq iserfigissallugu immikkut ittoq

Kinamiut nunatsinnut takornariartartut amerlisinnissaat Visit Greenlandip periarfissaqarluartutut isigaa. Kinamiulli pilerisaarnissaannut allatut periaaseqartoqartariaqartoq, Tanny Porip Visit Greenlandimi nunani tamalaani attaveqarfinnut akisussaasup oqaatigaa.

- Kina niuerfittut uatsinnut suli nutaajuvoq. Qanoq iliussanerluta suli misissorparput. Ajornakusuulaarpoq. Aaqqissuussaaneq allarluinnaq atorpaat. Inuit attaveqaqatigiittarfiia allat atorpaat, nittartakkallu allat aamma atorlugit. Aporfissaqarpoq, Kinali periarfissaqarluartutut isigaarput.

Kinami aqutsisup nunami internettimut attaveqarnermik firewall atorlugu aqutsinerat innersuussutigaa. Kinami aqutsisut taamaalillutik innuttaasut 1,4 milliardiusut nittartakkat suut iserfigisinnaaneraat aquppaat.

Kinami aqutsisut ilaatigut toqqarsimavaat innuttaasut ilarpassuisa Facebook iserfigisinnaassanngikkaat. Inuit attaveqaqatigiittarfiat Visit Greenlandip nunatta takornariarfissatut nittarsaanneqarnerani atorluagaa.

Inuussutissarsiorneq pillugu Kinami nittarsaassinermut Kim Kielsenip siuttuuffigisaanut Tanny Por angalaqatigiinnut amerlangaatsiartunut ilaavoq. Takornariartitsineq marlunngormat pingasunngormallu sammineqarpoq, Visit Greenlandilu angalatitsisunut arlalinnut attaveqalerpoq, taakkulu nunatta Kinami nittarsaanneqarnissaanut ikiorsiunneqassapput.

- Kinami angalatitsisartut ilaat attaveqarfigilerpagut, Tanny Por oqarpoq.

Tanny Por nunarput nittarsaakkiartorlugu ukiut marluk matuma siorna aamma Kinamiippoq, piffissamili tassani pisoqarsimaqaaq.

- Kalaallit Nunaat ukioq manna ilisimasaqarfigineqarluarpoq. Angalatitsisartut Kalaallit Nunaat ilisimavaat takornariartitsinermillu aallartisaarusullutik, Visit Greenlandip inuussutissarsiornikkut nittarsaassinermi aamma Naalakkersuisut, Air Greenlandip, Royal Greenlandip Polar Seafoodillu peqataaffigisaanni Kinami takornarianik angalatitsisartut naapissimasai pillugit taama oqarpoq.

Visit Greenlandip Kinamiut pigissaartortaat, silarsuarmi angalanissamut akissaqartut, atassuteqarfigilissallugit immikkut sulissutigaa.