Kina ilumoortumik oqaluppa

Danmarkip naalagaaffiata suliniutinut aningaasat immikkoortittagai, ilaatigut kalaallinut Danmarkimiittunut inooqatigiinnikkut ajornartorsiuteqartunut atorneqartartut, maanna Kalaallit Nunaanni qineqqusaarutigineqalerput.
septembarip 06-at 2011 09:42

Inuit Ataqatigiit qinigassanngortitaat, Sofie Rossen, Siumumiit ullumi appisaluunneqarpoq, KNR-imit apeqqarissaarfigineqarluni oqaatigimmagu, aningaasat suliniutinut immikkoortinneqartartut pillugit qallunaat naalakkersuisuisa ukioq kingulleq unitsitsiniaraluarnerannut Siumut iliuuseqarsimannginnerarmagu.

- Tamanna pissutsinut piviusunut naapertuutinngilluinnarpoq, Siumut tusagassiuutinut nalunaarummini allappoq. Akerlianik kalaallit imigassamik aanngajaarniutinillu atornerluinermik ajornartorsiuteqartut Danmarkimiittut suliniuteqarnissamut aningaasaniit immikkoortitaniit suli taperneqarsinnaanerat Siumup sulissuteqarneratigut pisoq oqaatigineqarpoq.

Kalaallit Danmarkimi innuttaasut sanngiinnerpaat ikiorserneqarnissaat pillugu aningaasat tunniunneqartartut attatiinnarneqarnissaat pillugu naalakkersuinikkut amerlanerussusiinermi Siumup Socialdemokratinik suleqateqarnera aalajangiisuulluinnarsimasoq, tamannalumi naluneqanngitsumik iluatsissismasoq, Siumup oqaaeqaatimini erseqqissarpaa.

Aammattaaq Siumukkormiut Sofie Rossenimut Inuit Ataqatigiinnullu naalakkersuineq pillugu appisaluusserujussuarput.

- Kalaallit Nunaanni taamaaliortarneq soorluuna oqaluttuaannanngorsimasoq, tassami Naalakkersuisut Inuit Ataqatigiit siuttoralugit Nuummi Ilulissanilu Qaqiffinnut isumaqatigiissutit atorunnaarsinnialerpaat. Isumaqatigiissutit katsorsaavinnut taakkununnga pingaaruteqarluinnartut. Allatut oqaatigalugu: Katsorsaaviit Inuit Ataqatigiit maanna matoorarnialerpai taamaalillutillu Kalaallit Nunaanni inuuttaasut sanngiinnerpaat, atornerluisuusut sumiginnarlugit, Siumumiit nalunaarut taamma nipeqarpoq.