Kim Ujarak Lorentzen Nuummi timersullammanngorpoq
Ukioq timersorfiusoq nuna tamakkerlugu pissartanngorniuffiunngitsoq Nuummi timersortartunik nersornaasiinermi januarip arfernat pisumi malunnarpoq. Nersornaatit siornatigut arfinilisaraluartut maanna sisamanut ikilineqarput.
Nersornaatit tunniunneqartut tassaapput timersullammak, maligassiuisoq, suliniuteqarluartoq kiisalu immikkut nersornaat.
Nuannarineqarluartumik Kim Ujarak Lorentzen timersullammattut toqqarneqarpoq. Taanna naalagaaffeqatigiinnermi oktoberip 24-at rekordiliivoq kivitseriaatsimi dødløftimi 401 kilo kivikkamiuk.
Immikkuullarissumik unammisitsineq
Nunatsinni nukittuneqqusaannermik aaqqissuisoq Allan Juhl suliniuteqarluartutut nersornaaserneqarpoq. Immikkuullarissumik suleriuseqarpoq inuit katersuussinnaanerat killilersorneqarmat kommunenit assigiinngitsunit peqataaffigineqartumik unammisoqarsinnaajunnaarmat. Unammineq Ilulissaniit, Nuummiit Københavnimiilu aallakaatinneqarpoq internet aamma messenger aqqutigalugit.
Uiloq Mathæussen arpannermigut maligassiuivoq arpattartut peqatigiiffiat Runderful Nuuk aallarneramiuk. Arpannermi periuseq taanna illoqarfinnut assigiinngitsunut siammarterpaa arpattartut suleqatigiinnerat annertusarniarlugu.
75-nik ukiulimmut Rebekka Olsvigimut ukiut kisitsisaannaapput. Taanna suliniaqatigiiffimmi Meeqqat ikiortigit-mi nammineq piumassutsimik suliniaqataanermigut pissakilliortut meerartaannik sulorartitsisarpoq. Aamma pineqartut taakku periarfissaqartikkumallugit sisorartalernissaannik suliniuteqartunut ilaavoq. Taamaammat immikkut nersornaammik tunineqarpoq tunniusimalluarluni suliniartuunini pillugu.
Kommuneqarfik Sermersooq illoqarfinni allani aamma nersornaasiissamaarpoq.
