Wæver Johansen: Kim Kielsen siuttuuvoq katersuuffiusoq
Taanna Sermitsiami allaaserisaqarnermini naalakkersuinermik alaatsinaattunut oqaaqqissaarivoq, Jørgen Wæver Johansenimi naapertorlugu politikeriusimasut, naalakkersuinikkut "arlaannaannulluunniit attuumassuteqanngitsutut" naalakkersuinermik alapernaatsut partiimi Siumumi avissaartuunneraallutik oqartarsimapput.
Piviusulli allaasut Jørgen Wæver Johansenip oqaatigaa, maannalu siulittaasoq Kim Kielsen matumani nukittuumik inissisimasoq oqaatigalugu:
- Kim Kielsen tassaanngilaq aqutsisoq sanngiitsoq, tassaanerullunili siuttoq katersuuffiusoq - siuttoq oqaloqatigineqarsinnaasoq, Jørgen Wæver Johansen naliliivoq, Siumumilu juulip naalernerani ataatsimeersuartoqarnissaani nutaamik siulittaasunngortoqarnissaa ilimaginagu.
Siumumili politikkikkut siulittaasup tullianik nutaamik qinersisoqassagunarpoq.
Politikkikkummi siulittaasup tulliata Nuummi najugaqartuunissaa naapertuunnerussasoq, Jørgen Wæver Johansenip Qaqortumi najugaqartup oqaatigaa.
Naak Siumumi Wæver Johansen naapertorlugu avissaartuuttoqanngikkaluartoq, inuiaqatigiinni ataqatigiinnerunissamik naalakkersuinikullu ataqqeqatigiilluni paaseqatigiinnerusumik ingerlatsinissatsinnut "politikeriusimasut politikerillu ukioqqortusisimasut" piffissartik annertunerpaaq atortariaqaraat isumaqarpoq, politikerit avissaartuunnissamik suliaqaannaratik sulinissaat kajumissaarutigalugu.
Siumumi juulip ulluisa 26-anit 28-ata tungaanut ataatsimeersuaartoqassaaq.