Kim Kielsen Siumumi aaqqissuusseqqissaaq
Paamiormiu politeeq Kim Kielsen Siumup siulittaasortaaraa. Tamanna pivoq Siumup immikkut ittumik ullumi ataatsimeersuarnerani qiningassanngortittunullu allanut tassaasunut Doris Jakobsenimut, Nick Nielsenimut aamma Siumumik aallarneeqataasumut Lars-Emil Johansenimut ajugaareerlunilu.
Siulittaasussamut qinersinermi taasisinnaatitaasut 66-iusut akornannit, Kim Kielsen 44-nik taaneqarluni ajugaavoq.
Kim Kielsenip ajugaanerminut atatillugu oqalugiarnermini oqaatigaa, qinersinerup nalaani annilaanngasimanani, tassami nalunnginnamiuk Siumukkormiumik siulittaasoqalersussaallutik. Taama oqareerluni attortisimaqaluni oqalugiarnini nangippaa oqalunilu suliassaq tulleq annertooq tassaasoq Inatsisartunut qinersinissap piareersarneqarnissaa.
- Suliassarpassuaqarpunga. Siullermik ataatsimoortitsiniarsarisussaavunga tassami unammilligassagut imaannaanngitsuupput, tassami inuiaqatigiinni suliffissaaleqisoqarpoq inissaaleqisoqarlunilu. Taakku taasakka suliassarpassuatta ilaminiinnaraat. Suliassamalu aamma ilagilluinnarpaa, partiit tamarmiulluta ataatsimut suleqatigiissinnaanerput, Kim Kielsen siulittaasutut qiningaareernermi kinguninngua radioaviisimut taama oqarpoq.
Aamma atuaruk Kielsen Siumumi siulittaasunngorpoq
Siumup siulittaasorisimasaa, Aleqa Hammond siulittaasussarsiornermut qinerseqataavoq. Taassuma siulittaasunngortoq Kim Kielsen tapersersorlugu oqaatigaa oqalunilu siulittaasutut Kim Kielsen piukkunnarluartuuasoq.
- Siumup siulittaasunngornerani pilluagaarli. Sulilluarnissaanik kissppaara. Kim Kielsen sullarissuuvoq anguniagaqartartoq inuiaqatigiillu tamarmik atorsinnaasaannik pingaartitaqarpoq. Kim Kielsen tassaavoq uanga nammineerlunga tapersersugara. Ajugaammallu assut nuannaaqataavunga, Aleqa Hammond oqarpoq.
Siumup siulittaasoriligaa suliassarpassuaqartoq unammillertaanik isertuunneqanngilaq. Ilaatigut suliassaasa pingaaruteqarluartut ilagaat, Siumup partiitut innarlerneqarnerata kingorna aaqqissuusseqqinnissaa. Taamatullu inuiaqatigiit akornanni minnerunngitsumillu Nunatsinni partiit akornanni suleqatigiinnissamik siuttuunissaa pingaaruteqartoq oqaatigineqarluni.
Siumup ilorraap tungaanut aallartinneqarnissaa, siulittaaasussarsiornermi unammillersut tamarmik suleqataaffiginiarlugu oqaatigaat.
- Kim Kielsen inuuvoq tatiginartuuvoq taamaattumillu inunnit ilisarisimaneqaleruni paasineqassaaq inuiaqatigiit akornanni partiillu akornanni suleqatigiissitsisinnaalluartoq, Nick Nielsen oqarpoq.
Nunatsinni partiit suleqatigiilersinneqarnissaannik siulittaasunngortoq unammillertunit ikiorumaneqarluarpoq.
- Pingaaruteqarluinnarpoq inuiaqatigiit avissaartuussimasut katersuutsinneqarnissaat. Taamatullu pingaaruteqarluni siulittaasunngortup partiinik assigiinngitsunik suleqateqarluarnissaa. Tamannalu Kim Kielsen annertuumik misilinneqaatigissavaa. Kimmip suliassaasa pingaaruteqartut ilagaattaaq Nunatta aningaasaqarnerata kivinneqarnissaa, tamannalu pillugu suleqatigiissaagut, Doris Jakobsen oqarpoq.
Kim Kielsenip siulittaasussarsuíornermi unammillertigilluagaa, Lars-Emil Johansen oqarpoq, ajorsarneq imatut misilittagaqarfigerujussuanngikkaluaramiuk taamaattorli siulittaasunngortumut ima siunnersuutissaqarluni oqaatigalugu.
- Partiip siulittaasuattut pingaarnerpaatinneqarneq ajorpoq parteeqatit isumaqatigiissinniarnissaat tassami parteeqatit isumaqatigiikkajummata. Suliassalli pingaarnerpaartarisarpaat partiinik allanik suleqatigiinnissamik anguniagaqarluni isumaqatigiinniarnissaq tamannalu suliassaq imaannaanngitsuusarpoq.
Inatsisartut siulittaasorigallagaat, Lars-Emil Johansen taama oqarpoq.
Siumup siulittaasuattut qinersinermi inernerit imaapput: Kim Kielsen 44-nik taaneqarpoq. Lars-Emil Johansen 17-inik taaneqarluni, Doris Jakobsen aamma Nick Nielsen tamarmik marlunnik taaneqartut.
Ataatsimeersuarnermi qinersisinnaasut katillutik 66-iupput ataaserli taasinngimmat 65-iinnaallutik.
