Politikki Inuussutissarsiutit

Kim Kielsen: Siulersuisut inissitsiterneqarnerannut suliassat kivissavagut

Tele-Post maajip 27-ani ataatsimeersualerpat siulersuisut Naalakkersuisunit taarserserneqarsinnaapput. Tele-Postimi piffissami kingullermi aalassassimaarneq pillugu Naalakkersuisut siulittaasuata Kim Kielsenip apersorneqarnermini erseqqissarpaa

Allattoq Ivik Kristiansen, Laura Aggernæs, Malu Pedersen, Peter Bye Andersen

apriilip 29-at 2015 16:13

- Soorunami suliat taama ingerlatillugit tamakkua angorusunnanngeqaat. Ulluinnarmi ingerlatsinermut tunngatillugu uagut Naalakkersuisut akuliussinnaannginnerput, siulersuisut suliassat taakku assigiinngitsut ingerlatassarivaat, naalakkersuisut siunnerfiinut tunngatillugu piviusunngortitsinissaq. Tassani sullissinissamut tunngatillugu ulluinnarni akuliukkaluarutta taava qanoq uparuarneqartigissaagut?, Kim Kielsen akuliutinnginnissamik isumamut innersuussuteqarluni oqarpoq.

Aamma atuaruk Tele-Postimi aqutsisut allanik taaguutitaartut

Tele-Postimi pisortaanerugallartoq Steen Montgomery-Andersen, pisortaanerugallartullu tullersortaa Per Svendsen siulersuisullu suleqatigiilluarsinnaannginnertik pissutigalugu atorfeqarallarnerminninngaanniit tunuarniarnerat, Kim Kielsenip toqqaannartumik oqaaseqarfigerusunngikkaluarlugu Tele-Postip iluani isumaqatigiinngissuteqartoqartartoq takusinnaallugu oqaatigaa.

Taamaammallu Naalakkersuisut periuuserisinnaasatik aqqutigalugit suliffeqarfiup ingerlalluarnissaanut sulissuteqartut oqaatigaa.

- Siulersuisut inissitsiterneqarnerannut suliassat kivissavagut, aamma ajornartorsiutit anigorniarnissaannut suliaq ingerlanneqartariaqassaaq, Kim Kielsen oqarpoq.

Aamma atuaruk Tele-Post qaammatit pingasut qaangiuppata pisortaaruteratarsinnaavoq

Tele-Postip siulersuisuini taarsiisoqassappat siusinnerpaamik maajip 27-ani pisinnaasoq Naalakkersuisut siulittaasuata oqaatigaa.

- Tele-Post upernaaru ataatsimeersuartussaavoq. Suliffeqarfigut 14-it upernaakkut ataatsimeersuartarput. Aamma siulersuisunut tunngatillugu tassani nalilersuisussaassaagut, Kim Kielsen oqarpoq.