Kim Kielsen: Naalakkersuisoqatigiinnut annaasaqaataavoq
- Demokraatit pisarnermissut sooruna ingerlaanassapput, Demokraatit inuk ataaseq pillugu napannginnamik kisiat amerlasoorujussuarnik inuttaqarluta ingerlaassaagut, Randi Vestergaard Evaldsen taama oqarpoq. Taanna Anda Uldum sulinngiffeqarnerani partiimi siulittaasuugallarpoq, taavalu inuussutissassiornermut suliffeqarnermut niuernermullu naalakkersuisuugallarluni.
Aamma atuaruk Uldumip napparsimalersimanera Kielsenip uppernarsarpaa
Anda Uldum politikikkut akisussaafini tamaasa tunuarfigai nulianilu Danmarkimut ilinniariartortoq ilagalugu nuunniarlutik tusagassiuutinut nalunaarummini ilaatigut oqaatigalugu.
Anda Uldum KNR-imiit ornillugu oqaloqatigaarput, kisianni politikkimiit tunuarnini annerusumik taassuma oqaaseqarfigerusunngilaa.
Anda Uldumip tunuarnera naalakkersuisoqatigiinnut annaasaqaataasoq, naalakkersuisut siulittaasuat Kim Kielsen oqaatigaa.
- Soorunami uggornarpoq Anda tunuarnera taamaattorli aamma uagut tapersertissaassavarput Anda nammineerluni taanna toqqarsimavaa inuttut nammineq peqqissutsiminut taanna pitsaanerpaassasoq, naalakkersuisut siulittaasuat oqarpoq, Demokraatilli aningaasaqarnermut naalakkersuisoqarfik tigummiinnassagaat erseqqissarlugu
- Demokraatit naalakkersuisuni issiaviit marluk tigummiarpaat taakkua tassa issiaviit tigummissavaat.
Aamma atuaruk Uldum stressernini pissutigalugu sulinngiffeqarallalersoq
Kim Kielsen Randi Vestergaard Evaldsen-lu aqagu naapissapput Uldumip tunuarneratigut ilaatigut aningaasaqarnermut naalakkersuisoqarfiup inuttalernissaa eqqartussallugu.
- Tassa isumaqatigiissutaanikuuvoq Demokraatit naalakkersuisoqarfik taanna tigumissagaat, tigoqqinnissaalu soorunami pissaaq, Demokraatini siulittaasuugallartoq Randi Vestergaard Evaldsen taama oqarpoq.
Aamma atuaruk Randi siulittaasuussaaq
Demokraatit februarip 13-ani immikkut ittumik ataatsimiissapput tassani toqqarneqassaaq kina Demokraatini siulittaasunngussanersoq.
Randi Vestergaard Evaldsen, Justus Hansen siulittaasunngorusullutik sassarniartut KNR maannakkumut paasivaa.