Karl Eliassen Nunatsinni inissiisarfimmiilissanersoq aalajangerneqartussanngortoq
Karl Eliassen Danmarkimi killiligaanngitsumik ukiut 17-it matuma siorna pineqaatissinneqarpoq sulilu Herstedvesterimiilluni.
Qaasuitsup eqqartuussiviata ukiormanna marsip qulingani aalajangerpaa, KE-mut pineqaatissiissut allanngortillugu Nunatsinni pinerluuteqarsimasunut inissiisarfimmut ammasumut nuutinneqassasoq, tamatumalu
malitsigisaanik inuiaqatigiinni piffissap ingerlanerani akuuleriartornissaa anguniarlugu inissinneqassasoq.
Qaasuitsup eqqartuussivianit eqqartuussinermit pappiliat KNRimit pissarsiarineqartut naapertorlugit psykiaterimit oqaaseqaatini allaqqavoq, Karl Eliassenip qanittumi 60-iliisussap eqqissilluni nipaattumillu pillaatini atoraa.
Karl Eliassen sakkortuumik pinerluuteqarsimasutut Aasianni pinerluuteqarsimasunut inissiisarfimmiitinneqarpoq. 2001-imili inissiisarfimmiitilluni ilaatigut inooqamminut politiinullu siorasaarisimasutut toqutseriarsimasutullu tillinniarsimasutullu eqqartuunneqarluni Hedstedvesterimi piffissaligaanngitsumik pineqaatissinneqaqqippoq.
Karl Eliassennillu Qaasuitsumi eqqartuussivimmut oqaatigaa, taamanikkut iliuuserisimasani ajorluinnartuusut paasisimallugit.
Nutaarmiuni pisoq allanngortitsisoq
Pisut allanngorneratigut pissutaasut ilagigunarpaat, KE-p 2014-imit Nutaarmiuni inunnik pingasunik toqutsisup inunnillu sisamanik toqutseriartup Herstedvesterimeeqatigilernera, toqutaasut ilaat Karl Eliassenip atsagisimavaa. Tamannalu pillugu KE-p ajussutigisarsimavaa.
Aammali tamanna peqqissimissutiginerarpaa, pinerluutigisimasanilu maanna peqqissimissutigalugit, taamaattoq aamma ukiuni 17-ini parnaarussaaqqanini sivisullunilu tamanna qaangiuttariaqarsoraa.
Karl Eliassenip suleqateqarnissamik piumassuseqannginnera ikiaroornartumillu atuisimanera pissutigalugit unnerluussisussaatitaasut kissaatigaat pineqaatissiissut attatiinnarneqassasoq.
Qaasuitsup eqqartuussiviatali KE-p unioqqutitsilluni pinerloqqinnginnissaminik parnaarussaaqqinnginnissaminillu nassuiaanera tusaaniarsimavaa, taamaattumik KE-p Nunatsinnut pinerluuteqarsimasunut ammasumut inissiisarfimmut nuutinneqassasoq aalajangerpaa, tamannalu aallaavigalugu unnerluussisussaatitaasut eqqartuussut aalajangeqqitassanngortillugu Nunatta eqqartuussisuuneqarfianut ingerlateqqippaat.
Eqqartuussut aalajangeqqitassanngortinneqartoq Nunatta eqqartuussisuuneqarfiani decembarip tallimaani marlunngornermi nalunaaqutaq qulinut aallartissaaq.
