Kilisaat aportoq
Savalimmiuni Torshavnimi kilisaat aalisariullu apormata immakkut ajutoornermut tunngasumik ullumi nassuiaateqartoqarpoq.
Kilisaat nunatsinneersoq, Salleq, Savalimmiormiut aalisariuteeraannut ataasinngormat ullaakkut aporpoq.
Kilisaat Salleq tunuporsortinniarneqarsimagaluarpoq, siumulli aallaannarsimalluni. Royal Greenlandimi ingerlatsinermut pisortap Jens Bisgaardip oqaatigaa ajutoorneq qallunaatut ”omstyring”-imik taaneqartartoq. Tassa kilisaatip kingumukartaataata ajoquteqarneratigut kilisaat killormut aallarsimavoq.
Apornermi aalisariuteeraq ajoqusingaatsiarpoq, kilisaatillu aporsisup siuatungaa annikitsuinnarmik ajoqusersimalluni.
Salleq Tunup avataanukassalluni avalallunilu aporsimavoq, apornermilu kingunerisaanik kinguaattoorluni.
Kilisaataatillit oqarput Salleq sapaatip akunnerata tulliani aatsaat aalisariarsinnaalissasoq.
