Assi: Flickr/Reykjavik Metropolitan Police

Birna pillugu suliaq Kilisaammi inuttat ilisimannittutut nassuiaateqariartortut

Polar Nanumi inuttat suleqatigisimasartik Birna Brjánsdóttirip toqutaaneranut atatillugu eqqartuussaaneranut nassuiaateqariartorlutik Islandimukarput.

Islandimiup arnap Birna Brjánsdóttirip toqutaaneranut eqqartuussineq aqagu marlunngornermi aallartinneqassaaq.

Tyskilli ilisimatuup nakorsap pinerlussimanermik paasiniaaneranik kinguaattooqqammat eqqartuussineq kinguaattoorsinnaavoq.

Islandimiut nutaarsiassaqartitsiviat Iceland Monitor taama allaaserisaqarpoq.

Nakorsap pinerlussimanermik paasiniaanerminik nalunaarusiaa piffissaq eqqorlugu tunniunneqanngippat unnerluunneqartup angutip 30-nik ukiullip killisiorneqarnissaa kingunartinneqassaaq.

Kilisaammili Polar Nanumi inuttat 13-it nassuiaateqarnissaat marlunngornermi aalajangersimaannarpoq.

Polar Nanoq Islandimukariartortoq, Polar Seafoodimi siulersuisuinut siulittaasup, Henrik Lethip KNR-imut oqaatigaa.

- Polar Nanoq Islandimut ullumi ataasinngornermi apuunnissaa inuttallu eqqartuussivimmi nassuiaateqarnissaminnut piffissaq eqqorlugu takkunnissaat naatsorsuutigaarput, Henrik Leth oqarpoq.

Kilisaat eqqartuussisoqarnissaq pillugu Reykjavikkimut talingajalerpoq taamaammat kilisaammi inuttat pilersaarut malillugu marlunngornermi nassuiaateqarnissaat qularnanngilaq, Iceland Monitor allappoq.

Unnerluunneqartoq angut 30-nik ukiulik politiinit januaarimili tigummineqalerpoq, Birna Brjánsdóttirimulli toqutsisutut suli pinngitsuunerarpoq.

Islandimiut unnerluussisussaatitaasuat naapertorlugu angutip inuaasa ipaasaat arnap biilinik ingerlatsisinnaanermut allagartaani nassaarineqarput angutillu annoraavani arnap aavanik aamma nassaartoqarluni.

Birna Brjansdottir tammaaneqalernerminit sapaatip akunnerata kingorna Islandimi illoqarfiit pingaarnersaata Reyklavikip kujataani sissami toqungasoq januaarip 22-ani nassaarineqarpoq.

AAMMA ATUARUK Unnerluutigineqartup nassuiaatini eqqartuussivimmi allanngortikkaa

 

AAMMA ATUARUK Birnamut tunngatillugu pasisaq pingitsuutinneqartoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!