Polar Nanoq Kilisaammi inuttaq politiinit iperagaavoq

Hashimik 20 kiilumik kilisaammi Polar Nanumi nassaartoqarneranut atatillugu tigusarineqartoq iperagaatinneqarsimasoq, pasisaajunnaartorlu Polar Seafoodip uppernarsarpaa.
ikiaroornartoq Politi stoffer
Assi © : KNR
Allattoq Mads Lynge
januaarip 22-at 2017 16:23

Hashimik 20 kiilumik kilisaammi Polar Nanumi nassaartoqarneranut atatillugu tigusarineqartoq iperagaatinneqarsimasoq, pasisaajunnaartorlu Sermitsiaq.AG-p allaaseraa.

Polar Nanumi inuttap iperagaasimanera, Polar Seafoodimi kilisaatinut pisortap Jørgen Fossheimip KNR-imut uppernarsarpaa.

- Politiit oqaatigaat suliamut atatillugu pisuunngitsoq, aamma tamanna naatsorsuutigisimavarput. Iperagaammallu nuannaarutigaarput, Fossheim KNR-imut oqarpoq.

Arnap Islandimiup periarfeerunneqarneranut atatillugu suliami Polar Nanumi inuttat marluk allat tigummigallagassanngortinneqarput.

Islandimi politiit Polar Nanumi kingorna misissuimmata hashimik 20 kiilumik nassaartoqarpoq. Ikiaroornartumik nassaartoqarnerata arnamut periarfeerunneqartumut attuumassuteqannginnera politiit ilimagaat.

Inuttaq ataaseq hashimik nassaartoqarneranut atatillugu tigusarineqarpoq, maannali iperagaavoq kilisaammullu utersimalerpoq, kilisaammullu uternera malunnartinniarlugu inuttat takornarniartinneqarput, Jørgen Fossheim KNR-imut oqarpoq.