Kikkut tamarmik qiiaamminartumik takujumapput
Katuap filmertarfiani pisortap Ove Heilmannip qularutiginngivippaa filmi 'Qaqqap alanngui' nunatsinni filmiliani alutorineqarnerpaanngoriaannaasoq, tunngavilersuutigaalu filmi imarisamigut nuannarineqarnissamut pisariaqartinneqartunik peqartoq.
- Nunatsinni nuannarisarpagut qiiaamminartut quianartullu, filmilu tamakkuninnga peqarluarpoq. Taamaammat inuit oqaluttuaqattaarnerat tunngavigalugu filmimut alapernaasertorpassuaqalerpoq. Ataqqinaammik piginnittut tassaapput filmiliortut, taakkumi torrallaalluavipput. Tamannarpiaavorlu nuannarineqarneranut pissutaasoq, Ove Heilmann oqarpoq.
'Qaqqat Alanngui' juunip 22-t ilanngullugu Katuami takuneqarsinnaajumaarpoq, filmertarfiullu pisortaata qularutiginngivippaa filmertarfiup ukiuni 14-ni ingerlasimanerani filmini taanna takuneqarnerpaanngorumaartoq.
- Qularutiginngivippara filmini nunatsinni nuannarineqarnerpaanngorumaartoq. Assersuutigalugu 'Nuummioq' 3.443-nit isiginnaarneqarpoq aamma 'Hinnarik Sinnattunilu'' 4.127-nit isiginnaarneqarluni. Eqqoriaanerinnaavoq kisianni isumaqarpunga, 'Qaqqat Alanngui' 5.000-nit isiginnaarneqarumaartoq, Ove Heilmann oqarpoq.
'Qaqqat Alanngui' alutorsaatigineqarnerminik aqagu aamma nangitsissaaq. Tassami Sisimiuni arfineq-pingasoriarluni takutinneqarfissamini takuteqqaarneqassaaq.
- Filmi sineriammi takuterusuttorujussuuarput. Seqersitsissut nassarlugu angalaartoqarsinnaavoq taamaasilluni illoqarfinni filmertitsissuteqanngitsuni takuneqarsinnaaniassammat. Aamma illoqarfinnit assigiinngitsunit saaffigineqarsinnaavugut siulliulluta saaffiginnereersimanngikkutta, filmiliortoq Malik Kleist ullumi AG-mi saqqummersumi kajumissaarivoq.