Air Greenland: Kiffartuussinissamik isumaqatigiissummik suli atsiunngilagut
Kiffartuussinissamik isumaqatigiissutissaq Air Greenlandip Naalakkersuisullu akunnerminni suli isumaqatigiinniutigigaat Air Greenland KNR-imut ilisimatitsivoq. Taamaammallu suli aatsioqatigiittoqarsimanani.
Isumaqatigiissummik maannamut atsiugaqarsimanngilagut, Air Greenlandimi pisortaaneq Michael Højgaard taama oqarpoq.
Sullissinissamut isumaqatigiissutit naatsorsuutaasutut inissi-tsi-tivissimanngitsut ullumi saqqummiunneqareersullu, taanna taama oqarpoq.
Michael Højgaarderili ilanngullugu oqarpoq naatsorsuutigalugu naalakkersuisoqarfimmiit isumaqatigiissu-tissatut siunnersuutit atsiorneqarumaartut, sulimi isumaqatigiinniartoqarpoq.
- Namminersorlutik Oqartussat isumaqatigiissutissatut siunnersuutit nassiunnikuusaat assigiinngitsunik oqaasissaqarfigaavut.
Apeqqutit teknikkimut tunngasut isumaqatigiissummi taama ittumi isumannaar-neqarsimasussat. Uagullu oqaaseriumasavut Namminersorlutik Oqartussat inatsisilerituuannut tunniutereerpavut, maannalu akissutissaat utaqqivagut.
Isumaqatigiissutit juunip 30-anni naammassineqareersimasussat siunnersuutit aatsaat septembarip 13-ianni tiguagut. Sulisut qassit sulisuuginnassanersut eqqarsaatigalugit tamatuma kinguneranik Air Greenland ajornartorsiulerpoq, aammali atuisunut pilersaarutit anngunnissaat eqqarsaatigalugit, Michael Højgaard oqarpoq.
- Aamma atuisartutsinnut angalanissamut pilersaarutit anngukkusussimagaluarpagut kingusinaarnerulli kinguneranik taamaaliorsinnaasimanata.
Kiffartuussinissamik isumaqatigiissutit pillugit Disko Linemi pisortaq, Frederik Sandgreen, KNR-imut massakkuugallartoq oqaaseqarumanngilaq.
Taamaattorli pisortap Disko Linep angallassinissamut pilersaarutitik oktobarip pingajuanni saqqummiunniarlugit sulissuteqarnertik ilisimatitsissutigaa.
KNR-imit Angallannermut naalakkersuisoq, Knud Kristiansen, oqaaseqartinniarlugu sulissutigaarput.