Kiffartuussinerup ajorseriarnissaanut IA akuerseqataavoq
Ilaasunik angallassinnermi kiffartuussinermut isumaqatigiissummut ajorseriarsimasoq, akisussaasuusumullu tamanna kinguneqartariaartoq, Inuit Ataqatigiit siulittaasuata tulliata Aqqaluaq B. Egede, isornartorsiuteqarpoq,
Taannali isumaqatigiisutissamut sinaakkuseeqataavoq, kiffartuussinerullu ajorseriaateqarsinnaaneranut akuerseqataalluni.
- Ajorseriartitsineq soorunami akisussaaffigineqarpoq, akisussaasorli kinguneqartumik akisussaatinneqartariaqarpoq, Aqqaluaq B. Egede tusagassiuutinut nalunaarummi 29 september nassiunneqartumi taama allappoq.
Aammali ilumoortuuvoq, Inatsisartuni aningaasaqarnermut akileraartarnermullu ataatsimiititaliaq kiffartuussinissamut isumaqatigiissutissanut sinaakkusiissuummat, tassanilu Aqqaluaq B. Egede siulittaasumut tulliuvoq.
Naalakkersuisut ataatsimiititaliallu akornanni allakkatigut attaveqatigiinneranni atuarneqarsinnaavoq, aningaasaqarnermut akileraartarnermullu ataatsimiititaliap arlaleriarlugu qulakkeerlugu oqaatigigaa, aningaasanut inatsimmi kiffartuussinissamut isumaqatigiissummut atugassatut immikkoortitat sinnerneqassanngitsut.
- Suliami aningaasatigut sinaakkutissat oqaluuserinissaat Aningaasaqarnermut Akileraartarnermullu Ataatsimiititaliap tunngavissaqarsorinngilaa, ataatsimiititaliaq Naalakkersuisunut 28 april allappoq.
Aamma atuaruk inatsisartut-kiffartuussinissamik-siumaqatigiissutit-sinaakkusernikuuaat
Attaveqarmut Naalakkersuisoq Knud Kristiansen ataatsimiiititaliamut erseqqissaavoq, aningaasaqarnikkut sinaakkusiussat ilaasunik kiffartuussinerup ajorseriaateqarneranik kinguneqassasut.
- Aningaasaqarnermut sinaakkusiussat allanngortinneqassanngippata aammalu ilaasut nammineerlutik akiligassaat qaffatsineqassanngippata, Namminersorlutik Oqartussat pitsaassutsimik ilorrisimaarnassutsimik imaluunniit tunngavissnik inuiaqatigiinnut pingaartulinnik allanik appaasariaqalersinnaapput, Knud Kristiansen ataatsimiititaliamut maajip ulluisa arfernganni allappoq.
Ataatsimiititaliap taama paasissutissinneqareeraluarluni, maajip ulluisa aqqarnganni akuersissutigaa, naalakkersuisoqarfik ilaasunik angallassinermik kiffartuussinissamik isumaqatigiissuteqarsinnaasoq.
Aamma atuaruk: akuersaarneqarsinnaanngilaq-tukallunilu
Kisianni kiffartuussinerup ajorseriateqannginnissaanik ataatsimiititaliaq Aqqaluaq B. Egedep suli neriorsorneqarsimanerarpaa, naak Knud Kristiansenip akissutaani taama allassimanngikkaluartoq.
- Naalakkersuisut taamanikkut siunnersuuteqarput aningaasaliissutit appartinneqassasut, taavalu aningaasanut inatsimmi siuliini oqaaseqaammi kiffartuussinerup ajorseriannginnissaa oqaatigineqarpoq, aningaasaliissutigineqartut ikileriartinneqartussaagaluartut, taannaavorli inatsisartuni aalajangiinermi tunngavilersuutigineqartoq, Aqqaluaq B. Egede taama oqarpoq.
Kiffartuussinissamik isumaqatigiissutit atsiorneqareersut ataatsimiititaliamut tusarniaassutigineqarmata, kiffartuussinerit ajorseriarsimanerat pillugit Inuit Ataqatigiit ikinnerussuteqarlutik aatsaat oqaaseqaateqarput. Taamalineranili ataatsimiititaliaq isumaqatigiissutinut sunniuteqarsinnnaajunaareerpoq.
Aamma atuaruk kiffartuussinissamik-isumaqatigiissut-ataatsimiititaliamit-paamaarunneqanngilaq
Isumaqatigiissutit atorunnaarsinneqassasut immikkulluunniit aningaasaliinikkut pitsanngoriaateqassasut, IA-p piumasaqaatiginikuuaa. Tamannali sumiit aningaasalerneqassanersoq Aqqaluaq B. Egedep akiumanngilaa:
- Isumaqarpunga Naalakkersuisut tamanna suliassarigaat, Inatsisartuni aningaasaqarnermut akileraartarnermullu ataatsimititaliami siulittaasup tullia taama oqarpoq.