Kielsenip naalakkersuisooqatigiivi nutaat aajuku
![](/sites/default/files/styles/image_934x467/public/article_images/ny_koalition.jpg?itok=0URmu3uv)
Ulluni 22-ni politikkikkut nalorninartorsiorneq taamaalilluni qaangiuppoq. Kim Kielsen septembarip qulingiliuaanili naalakkersuisooqatigiinnik nutaanik pilersitsinissamik sulissuteqalerpoq, Kim Kielsenip nunatsinni mittarfiliortiternissat pillugit danskit ministeriunerannut isumaqatigiissuteqarnera akerleralugu Partii Naleraq naalakkersuisooqatigiinnit tunuarmat.
Kim Kielsen naalakkersuisooqatigiinnik nutaanik marlunngornermi saqqummiussivoq. Atassut marlunnik Nunattalu Qitornai ataatsimik Inatsisartuni ilaasortaatitaqarput. Naalakkersuisut Inatsisartuni tunuliaqutaat 13-iupput, Demokraatilli naalakkersuisooqatigiinnut Inatsisartuni tapersersortaapput Kielsenilu taamaalilklu Inatsisartuni 19-inik amerlanerussuteqarluni.
AAMMA ATUARUK Demokraatit naalakkersuisooqatigiinnissamut itigartitsipput Kielsenili tapersersorlugu
Kielsenilli amerlanerussuteqaraluarluni naalakkersuisut ikinnerussuteqartut siuttuuffigissavai, Inatsisartunilu suliamit suliamut amerlanerussuteqarnissaq qulakkeerniartartussaassallugu.
Siumup siulittaasuata tusagassiortunik katersortitsinermi oqaatigaa partiit naalakkersuisooqataasut pingasuusut politikkikkut isumaqatigiissut annikinnerusoq atsioqatigiissutigigaat. Naalakkersuisooqatigiit siuliisa isumaqatigiissutaat 340-nik immikkoortortaqarpoq.
Kielsenip aamma oqaatigaa maanna naalakkersuisuusut allanngussanngitsut.