Politikki

VIDEO Kielsenip meeqqat atugarisaat oqaluuseralugit qullipitsitsivoq

Naalakkersuisut siulittaasuat sapaatip akunnera kingulleq Qaqortumi innuttaasunik ataatsimiisitsimmat meeqqat ajornartorsiutaat oqaluuserineqalermata tusarnaariat attortisimallutik malinnaalluaqqissaarput.

Allattoq Jørgen Semionsen

februaarip 15-at 2016 15:40

- Iliuuseqarfigisariaqaratsigit. Akuersaarneqarsinnaanngilaq meeqqat taamatut iliuuseqarfigineqartut, naalakkersuisut siulittaasuat, Kim Kielsen KNR-imut oqarpoq.

Naalakkersuisut siulittaasuat ilungersorpasittumik isikkoqarluni, meeqqat ilaasa atugarisaat pillugit sivisuumik oqalugiarpoq.

- Ullut tamaasa, ukioq kaajallallugu, maani nunatsinni meeraq ataaseq minnerpaamik sumiginnarneqartarpoq, kinguaassiutitigut atornerlunneqartarpoq, arlaatigut iliuuseqarfigineqartarpoq. Taakkua oqallisigisariaqarpagut. Akueriuminaapput. Pissutsit taamaattut aamma akuersaarsinnaanngilluinnaqqinnaarpagut, Kim Kielsen KNR-imut oqarpoq.

Aamma atuaruk Meeqqanut ileqqorissaarnissamut oqallittarfimmik pilersitsilersaartut

- Nunatta siunissai, nunatta pisussutaa pingaarnerpaaq illersorsinnaanngikkutsigu taava sumiissuugut? Kim Kielsen aperivoq.

Suliniutigineqartussat iluatsinnissaat ataatsimeeqataasut aamma kissaatigaat.

Naalakkersuisullut meeqqat ukioqartitsinermi suliniutigissamaagaat, uuma qaammatip tulliani piareerneqartussaasimapput.