Kielsenip Kofodillu Issittoq pillugu ataatsimeersuarneq aallarneraat

Nunatsinneersorpassuit ukiumoortumik ataatsimeersuarneup Arctic Circle Assembly-ip Islandimi illoqarfiit pingaarnersaanni Reykjavikkimi ullumi ammaanersiorneqarani peqataapput.

Naalakkersuisut siulittaasuat, Kim Kielsen, Issittoq pillugu ataatsimeersuarnerup peqataasoqarfiunerpaasartup ammaanersiorneqarnerani oqalugiartut ilagaat.

Nunanut allanut naalakkersuisoq, Ane Lone Bagger, nunarput sinnerlugu peqataasut oqalugiartullu aamma ilagaat. Taassuma Sermitsiaq.ag-mut oqaatigaa, nunarput sinnerlugu ukioq manna peqataanerminni nunanik allanik niueqateqarnissatsinnut, aningaasaliinissatsinnut suleqateqarnissatsinnullu piareersimanitsinnik erseqqissaanissartik pingaarnertut siunertarigitsik.

- Arctic Circle Assembly-ip ukioq manna ingerlanneqarnerani pingaarnertut ukkatarisassarput aningaasaliinissatsinnut suleqateqarnissatsinnullu piareersimanitsinnik erseqqissaanermut tunngammat sammisassatsitut pilersaarutigineqartut nuannaarutigisorujussuuakka, Sermitsiaq.ag-imut oqarpoq.

Naalakkersuisut: Niueqateqarnissatsinnut piareersimavugut

Tamanna nunatta Amerikap præsidentiata Donald Trumpip nunarput qaammatit marlungajaat matuma siorna pisiariumareeraalu nunanut allarpassuarnut aamma nalunaarutigaa.

Tamatumunnga atatillugu nunanut allanut pisortaqarfik Twitterikkut ima allappoq: 'We are open for business, but we’re not for sale' - 'Vi er åbne for handel, men ikke til salg (Niueqateqarusuppugut tuniniagaanngilagulli, aaqq.). Tamannalu nunarput ataatsimeersuarnermi sammineqarmat nunarput sinnerlugu peqataasunit soorlu Ane Lone Baggerimit RAL-illu pisortaanit Verner Hammekenimit nalunaarutigineqaqattaarpoq: 'Niueqateqarusuppugut'.

Nunanut allanut ministeri, Jeppe Kofod, naalagaaffeqatigiiusugut sinnerluta Danmarkilu sinnerlugu peqataasoq ataatsimeersuarnermik ammaanersiornermi oqalugiartut aamma ilagaat.

Jesper Kofodip ataatsimeersuartoqarnera naalagaaffeqatigiiusugullu ataatsimeersuarnermi peqataanerput nunanut allanut ministereqarfiup tusagassiuutitigut nalunaarutaani pingaartinnerarpai.

Issittumullu tunngatillugu isumannaallisaanermut politikkip pissaanilissuillu nunatsinnik soqutiginninnerat piffissami kingullermi eqqartugaanerpaajugaluartulluunniit. Jeppe Kofodimmi ataatsimeersuarnermi sammisat allat allatuulli pingaaruteqartorujussuusorai.

Peqataasut 2000-t sinnerpaat

- Issittormiummi minnerunngitsumillu kalaallit ulluinnarni inuunermi atukkanut tunngasut sammineqarnissaat pingaartittupilussuuaat. Tamatumani aningaasaqarnikkut patajaatsumik ineriartortitsineq, silap pissusia inuunermilu atukkat pineqarput. Pissutsillu taakku kunngeqarfiup Kalaallit Nunaat Savalimmiullu qanimut suleqatigalugit ilusilersugassaminik Issittoq pillugu nutaamik periusissiuornissaanut pingaaruteqartorujuusussaapput, Jeppe Kofod oqarpoq.

Politikerit, inuussutissarsiortut ilisimatusartullu 2000-t sinnerlugit nunanit assigiinngitsunit 60-ineersut ataatsimeersuarnermi peqataapput.

Taamatuttaq Islandip ministeriunera Finlandillu ministeriunera, Sverigep dronninngissaa Victoria, savalimmiormiut nunanut allanut ministeriat, Amerikap nukissiuuteqarnermut ministeria aamma Inuit Issittormiut nunani tamalaani siunnersuisoqatigiivisa siulittaasuat Dalee Sambo Dorough peqataasut aamma ilagaat.

Kalaallit Nunaata USA-mi Sinniisoqarfiani pisortaq, Inuuteq Holm Olsen, Greenland Holdingimi pisortaq, Karsten Høy, nunatsinni meeqqat illersuisuat, Aviâja Egede Lynge, Inatsisartut Nunanut Allanut Sillimaniarnermullu ataatsimiitsitaliaanni siulittaasoq, Aleqa Hammond, ilisimatusartorpaaluillu Ilisimatusarfimmeersut allarpassuillu nunarput sinnerlugu peqataapput.

Arctic Circle Assembly 2019 arfininngornerup tungaanut ingerlanneqartussaq ullumi aallartippoq.