Kielsen umiarsuarmik tunitsiviliinissamut periarfissiivoq
Siunnersuut, Karl Kristian Krusep Naalakkersuisunut ippassaq saqqummiummagu ilalersorneqanngilaq.
Kim Kielsenili maanna oqarpoq, siunnersuut unitsivinneqanngitsoq.
- Naatsorsuutigaarput sapaatip akunnerata tulliata aallartilaarnerani nanginneqassasoq. Iimaannginami umiarsualiinissaq itigartikkipput, kisianni tassani nalilersuutit assigiinngitsut umiarsuarmut tunngatillugu, taakkua eqqarsaatigisariaqaratsigit, Naalakkersuisut siulittaasuat, Kim Kielsen oqarpoq.
Saarulliit qeritiinnarlugit nunanut allanut nassiussuutiinnarnagit, nunamut pinngitsoorani tunineqarlutik tisaneqartarnissaat, taamaalillutillu suliffissaqartitsilernissaat Naalakkersuisut pingaartippaat.
Umiarsuarnik tunitsiviliinermut periutsit pillugit suliaq Naalakkersuisuni suli suliarineqartoq, Kim Kielsen oqarpoq.
Tulaassisussaatitaanermut tisasussaatitaanermullu tunngasut, tamarmik nunami suliffissaqartitsissasut, umiarsuarnik tunitsiviliinermi periutsit allanngortitsinnagit, paasisaqarfiginerunissaat Naalakkersuisut kissaatigisimagaat, Aalisarnermut Naalakkersuisoqarfimmi pisortaq, Jørgen Isak Olsen KNR-imut mailikkut naatsumik akissuteqaatigaa.
Aamma atuaruk Aalisartut kissaataat naalakkersuisunit itigartinneqarpoq
Aalisarnermut naalakkersuisoq Naalakkersuisoqarfialu umiarsuarnik tunitsivissamut periusissanut siunnersuummik nutaamik ulluni qaninnerni saqqummiissapput, siunnersuulli qaqugu saqqummiunneqassanersoq tassanngaanniit oqaatigisinnaanngilaat.
Karl Kristian Kruse aamma ippassaq oqaluttuarpoq siunnersuutini Naalakkersuisunut tamanut saqqummiutsinnagu Nalakkersuisut siulittaasuata Naalakkersuisoqarfianut misissorteqqaartussanngorsimasoq. Tassalu Karl Kristian Kruse suliamut matumunnga tunngatillugu nakkutigineqalertutut tamanna paasisariaqarpoq.
Tamannali naalakkersuisut siulittaasuata eqqunnginnerarpaa.
- Suminngaanniit taanna saqqummersimassanersoq naluara, kisianni aalisarnermut naalakkersuisup aalisarnermut tunngassuteqartut akisussaaffigai, tassa, Kim Kielsen oqarpoq.
Maanna saarullinnik pisassiissutit 32.000 tonsiupput, sinerissap qanittuani saarullinniarnermut 25.000 tonsit misiliutitullu avataani aalisarnermut 7000 tonsiullutik.
Aamma atuaruk Sisimiuni aalisartut umiarsualivimmik assersuinissamut piareeqqapput
