Kielsen Siumut siulittaasussaatut sassarpoq
- Ulluni kingullerni Siumup immikkoortortaqarfiiniit sinniisuiniillu sakkortuumik kaammattorneqarpunga partiip siulittaasuatut qinigassanngortinnissannik, aamma isumaliutigilluareerlugu, ilaquttannillu tapersersorneqarlunga, aalajangerpunga akuersaarniarlunga.
Aamma atuaruk Doris Jakobsen Siumumi siulittaasunngorusuppoq
- Maniguullunga qinigassanngortippunga, nalunagu Inatsisartunut qinersinissamut piffissaq sivikitsuinnaq atorneqartussaasoq. Qinersisartut paasisariaqarpaat Siumumi kina siuttuulluni qinigassanngortinneqarnersoq, taamaasilluta kalaallit inuiaqatigiillu ukiuni sisamani tulliuttuni qanoq anguniagaqarfiginerlugit sinaakkuserniarnerivullu nalornisoqaqqunagu, tusagassiutinut nalunaarummini allappoq.
Kim Kielsen Avatangiisinut Pinngortitamullu maannamut Naalakkersuisuusimavoq, ullullu kingulliit Naalakkersuisut Siulittaasuugallarluni Aleqa Hammondip sulinngiffeqalernerata kingorna.
- Siumut aalajangiisinnaassuseqartumik, anguniagalimmik iliuuseqarsinnaassuseqartumillu siulersorteqartariaqarpoq, Inatsisartuni, kommunini nunaqarfinnilu ataatsimoorussamik aalajangiinernik naaperiutinillu ataatsimoortitsisinnaasumik, taamaasilluni politikki ataatsimoorfiulerluni aammalu piumassuseqartumik aaqqiiniarluni suliniarfiulerluni, nalunaarummini allappoq.
Ataatsimoornerput nukittorsartariaqarparput
Kim Kielsenip ilanngullugu erseqqissarpaa, Siumut ukiuni 31-ni affarmilu inuiaqatigiit ineriartortinneqarneranni siuttuusoq. Ineriartornerlu taanna Kim Kielsenip nangikkusuppaa.
- Kikkut tamarmik siuariartornermut, ineriartornermut attanneqarsinnaasumillu aaqqeerusuttut ilaseraakka, nunatta silarsuarmioqataanitsinnik alloriartikkumallugu. Inuiattut ataatsimoortariaqarpugut. Ataatsimoornerput nukittorsartariaqarparput. Pilersikkusuppavut inuiaqatigiit tamanut inissaqartitsisut sumi inunngorsimaneq, qalipaat, kulturi, upperisaq imaluunniit oqaatsit apeqqutaatinnagit.
