PITUFFIK Kielsen siumut isigivoq
- Nalunaarusiap oqariartuutai ersaripput. Taamanikkut Naalakkersuisut ilisimatinneqarsimanngillat, Kim Kielsen taama oqarpoq, nangillunilu.
- Naalakkersuisut tutsuiginassusaat apeqquserneqaqattaarpoq. Ilisimasaqarnerarlugit allatigullu. Kisianni taanna qulaajaanermit takutinneqarpoq, taamaattoqanngitsoq, Kim Kielsen oqarpoq.
Taamaattoq Pituffimmi kiffartuussinissamik isumaqatigiissutip suliarineqarnerani atorfilittat piginnaatitaaffiginngisaminnik iliuuseqarsimanerat, nalunaarusiamik suliarisitsisut Kim Kielsenip, aamma nunanut allanut naalakkersuisup, Vittus Qujaukitsup ajuusaarutigaat.
Aamma atuaruk Qujaukitsoq: Atorfilinnik soraarsitsisoqarnavianngilaq
Kim Kielsenili nassuiaavoq, nunanut allanut pisortaqarfimmi pisortap atorfiata suliassanik nassuiaataani allaqqavoq, naalakkersuisoqarfimmi pisortaq aamma politikkikkut akisussaasoq sullittussaagai. Pisortallu oqartussanut marlunnut assigiinngitsunut sullissisussaanera paatsoortitsisinnaasoq erseqqissarlugu.
Kim Kielsenip Naalakkersuisut siulittaasuattut siuliata Aleqa Hammondip Pituffiup kiffartuunneqarnissaanut suliaq politikkikkut suliassaasorinagu atorfilittaminut suliassanngortissimagaa, nalunaarusiami aamma erserpoq.
Aamma atuaruk Aleqa Hammond: Oqaaseqarfigerusunngilara
Kielsenili Aleqa Hammond pillugu oqaaseqarusunngilaq.
- Inuit ataasiakkaat taamatut oqariartuuteqarfigissallugit uanga kusaginngilara. Uani suliami kukkuluttortoqarsimasoq takutinneqareerpoq. Taakkulu kukkuluttornerit aaqqinniarlugit iliuuseqareerpugut, Kim Kielsen oqarpoq, ilanngullugulu oqarluni, atorfilittani tatigalugit.
Taakkua Namminersorlutik Oqartussani politikkikkut oqartussaaffiit akisussaaffiillu qanoq agguataarneqarnissaat erseqqissaleruttormatigit.
Aamma atuaruk Kai Holst Andersen akisussaanerpaavoq
Aamma Danmarkimit kukkusoqarsimasoq, nalunaarusiami inerniliussaavoq. Tamannali Kim Kielsenip oqaaseqarfigerusunngilaa, Nunatsinnilu pisimasut paasiniaaffigerusunnerullugit oqarluni.
- Uagut maani Nunatsinni attuumassuseqartut qulaajassavavut, Naalakkersuisut siulittaasuat Kim Kielsen oqarpoq.
Aamma atuaruk Nunatsinnit siunnersuutaasoq tusaanngitsuusaarsimagaat
Aamma atuaruk Danskit nunanut allanut ministeriat oqaaseqarumanngilaq
Pituffimmi kiffartuussinissamik isumaqatigiissutip 2,4 milliardit koruuninik nalillip Nunatsinnit Danmarkimiillu annaaneqaqqinnginnissaa anguniarlugu Nunanut allanut naalakkersuisup, Vittus Qujaukitsup USA-mi Danmarkimilu oqartussat isumaqatiginninniaqatigereerai, Kim Kielsen aamma oqarpoq.
