Kielsen: Pituffik pillugu misissuinerup inernera tusarniutigineqaqqaassaaq

Pituffimmi kiffartuussinissamut isumaqatigiissutip annaaneqarneranut eqqartuussissuserisup misissuineranut atatillugu apersorneqartunut tusarniutigineqaqqaartussaasimavoq, apersorneqartut allatulli pisinnaatitaaffeqarput pisinnaatitaaffiit taakku ataqqineqartussaapput.

Taama Naalakkersuisut qisuariaateqarput, Inuit Aqatigiit siulittaasuata Sara Olsvigip misissuisitsinerup inernerata saqqummiunneqarsimannginera pillugu isornartorsiutaannut akissuteqarlutik. Misissuitsinerup inerneri Inatsisartunut innutaasunullu saqqummiunneqarsimannginnera IA-p siulittaasuanit isornartoqartinneqarpoq.

Pituffimmi kiffartuussinissamut isumaqatigiissutip annaaneqarnera pillugu eqqartuussissuserisup misissuineranit nalunaarusiaq qaammatip aappaa affarlu matuma siorna Naalakkersuisunut tunniunneqarpoq.

Aamma atuaruk Olsvig: Eqqartuussissuserisumik misissuisitsinerup inerneranik saqqummiussisoqartariaqaraluarpoq

Pissutsit arlallit isumagineqaqqaartariaqarput, Naalakkersuisut Siulittaasuat Kim Kielsen tusagassiuutinut nalunaruteqarluni taama allappoq.

- Eqqartuussissuserisup nassuiaataa misissuinermi apersorneqartunut tusarniutigineqaqqaartussaasimavoq, apersorneqartut allatulli pisinnaatitaaffeqarput, pisinnaatitaaffiit taakku ataqqineqartussaapput. Inatsisartunut ilaasortat kalaallisuinnaq oqaaseqartut pisinnaatitaaffii aamma ataqqineqartussaapput, Kim Kielsen oqarpoq.

Naalakkersuisut siulittaasuata oqarnera naapertorlugu eqqartuussissuserisup nassuiaataa 200-ut sinnerlugit qupperneqartoq kalaallisuunngortinneqartussaavoq, tamannalu piffissamik atuinarpoq.

- Tusarniaaneq nutserinerlu piffissamik atuinarput, Naalakkersuisut siulittaasuat oqarpoq.

- Eqqartuussissuserisup nassuiaataani isumannaallisaanermut nunanullu allanut politikkimut tunngasut aamma nalilersoqqaarneqartussaapput nalunaarutip saqqummiutinnginnerani, Naalakkersuisut siulittaasuat oqarpoq.

- Naalakkersuisut nassuiaammik suli saqqummiussinnginnerat imaanngilaq suleqatikkuminaanniarlutik matoqqasumillu ingerlatsiniarlutik aalajangernerigaat.

- Soorlu naalakkersuisooqatigiinnissamut isumaqatigiissutitsinni allassimasoq ammasuunissaq suleqatigiinnissarlu kissaatigaarput, Naalakkersuisut siulittaasuat Kim Kielsen Inuit Ataqatigiit siulittaasuata Sara Olsvip pituffimmi kittartuussinissamut isumaqatigiissutip annaaneqaneranut eqqartuussissuserisup misissuitsineranit nalunaarutip saqqummiunneqannginneranut ujartuineranut akissuteqarluni taama allappoq.