Kielsen: NunaMinerals aningaasaliisussanik amigaateqarpoq

Nunamineralsip angusai suliffeqarfiullu ingerlanneqarnissaanut pilersaarutai Naalakkersuisunit pakatsiffigineqarput.
Assi © : KNR
Allattoq Nauja Møller
januaarip 28-at 2015 06:11

 

Namminersorlutik Oqartussat tusagassiutinut nalunaarutaanni ullumi nassiunneqartumi ilaatigut taama allassimavoq.

- NunaMinerals nammineerluni selskabip ingerlateqqinnissaanut pilersaarummik ajoraluartumik saqqummiussisimanngilaq. Tamanna uggornarpoq, ingammik Naalakkersuisut novembarip 27-anni 2014-imi 4,5 millionit koruuninik taarsigassarsititsinerminni selskabip nutaamik pilersaarusiorneqarnissaanik siunnerfilerneqarnissaanillu piumasaqarnerat eqqarsaatigalugu. Tassani Nunatsinni aningaasaqarnikkut inissisimanerput ingammik eqqarsaatigisariaqarput, Kim Kielsen nalunaarummini taama allappoq.

AAMMA ATUARUK Nunaminerals nalikillileerujussuarnermigut ilungersunartorsiorluinnalersoq

Nunaminerals sisamanngorpat immikkut ittumik ataatsimeersuassapput, suliffeqarfiup siunissaa aningaasaliisunit tassani aalajangiiffigineqassalluni. Maannakkumulli suliffeqarfiup siunissami ataannarnissaanut ingerlariaqqiffissanik piginnittunit Naalakkersuisut kisiartaallutik siunnersuuteqarput.

AAMMA ATUARUK NunaMinerals februaarimi matoriaannaavoq

Maannamut selskabimik annaassiniarluni allamik pilersaaruteqanngilaq, unneqqarissumillu oqaatigissagaanni siulersuisut aktiaatilinnut paasissutissanik apuussaqartarsimanngillat. Tamannalu selskabimut iluaqutaasimanngilaq.

- Aqutsinerliortoqarpoq, taakkulu aningaasaliisartut mianersornerannik pissuteqartumik aningasaliisussarsisinnaannginnerannik saniatigut eqqugaallutik, Kim Kielsen naggasiivoq.